Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 401 Hüküm no: 445 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saime bt. Halil’in geçinemediği kocası Mehmed b. Ramazan’dan boşanıp birbirlerinin zimmetlerini ibra ettikleri Mahmiye-i İstanbul’da Dülgerzâde Mahallesiʼnde sâkine olup zâtı ta‘rîf-i şer‘î ile mu‘arrefe olan Saime bt. Halil nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Mehmed b. Ramazan nâm kimesne mahzarında ikrâr-ı tâm ve takrîr-i kelâm edip zevcim mezbûr ile beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere mezbûr Mehmed ile muhâla‘a-i sahîha-i şer‘iyye ile hul‘ olduğumda ol dahi minvâl-i muharrer üzere hul‘-ı mezbûru kabûl eylediğinden sonra hukūk-ı zevciyete müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Mehmed’in zimmetini ibrâ-i âmm-ı kātı‘u’n-nizâ‘la ibrâ ve iskāt eyledim ve mezbûr Mehmed dahi kezâlik hukūk-ı zevciyete [müte‘allika] âmme-i de‘âvî ve mutâlebâtdan benim zimmetimi ibrâ ve iskāt eyledi fîmâ-ba‘d birbirimiz ile vechen mine’l-vücûh kat‘â da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 4 min-Recebi’l-ferd sene 1121 Şuhûdü’l-hâl: Mustafa Bey b. Abdullah, Ahmed b. Abdurrahman, İbrahim Çelebi b. Mehmed, Ahmed b. Mehmed, Mustafa Çelebi b. Şa‘ban, Ali Çelebi b. İvaz ve gayruhum mine’l-huzzâr.