Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 402 Hüküm no: 446 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Süleyman Efendi b. Mustafa’nın evini istiğlal yoluyla Kadı Mahmud Efendi b. Hasan’a sattığı Vilâyet-i Rumeli’nde Arnavud Belgradı kazâsı muvakkiti olup mahmiye-i İstanbul’da Ali Paşa-yı Atîk Mahallesiʼnde sâkin fahrü’l-kuzât Süleyman Efendi b. Mustafa nâm kimesne meclis-i şer‘-i şerîf-i enverde sâbıkā Sobice kādısı olan Mahmud Efendi b. Hasan tarafından husûs-ı âti’l-beyânı tasdîka vekîl-i sâbitü’l-vekâlesi olan işbu râfi‘u’l-kitâb Salih Çelebi b. İbrahim nâm kimesne mahzarında ikrâr ve takrîr-i kelâm edip mahalle-i mezbûrede vâki‘ iki tarafdan Osman Efendi mülkü ve bir tarafdan Muhzır Abdi Çelebi mülkü ve bir tarafdan tarîk-i âm ile mahdûd ma‘lûmü’l-müştemilât mülk menzilimi müvekkil-i mezbûra bi-tarîkı’l-istiğlâl dört yüz kırk beş guruşa bey‘ ve teslîm eylediğimde ol dahi bi’l-vekâle iştirâ ve tesellüm ve kabûl eylediğinden sonra semeni olan meblağ-ı mezbûr dört yüz kırk beş guruşu vekîl-i mezbûr yedinden tamamen ahz u kabz eylediğimden sonra menzil-i mahdûd-ı mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâb senesi Receb’i gurresinden bir sene tamamına değin yine bana altmış altı buçuk guruş ve bir rub‘ guruşa bana îcâr ve teslîm ben dahi istîcâr ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Recebi’l-ferd sene 1121 Şuhûdü’l-hâl: İlbasan kazâzından munfasıl Ahmed Efendi, Samako kazâsından munfasıl Hasan Efendi, Menlik kazâsından munfasıl Mehmed Efendi, Berber el-Hâc Osman, Badracık kazâsından munfasıl Mehmed Efendi, Deroveş? kazâsından munfasıl Mehmed Efendi, Müderris İsmail Efendi, Ömer Ağa b. Ali Ağa, el-Hâc Ali Ağa b. Hüseyin Ağa, Mustafa b. Şa‘ban, Ali Çelebi b. İvaz, Hasan b. Mustafa ve gayruhum mine’l-huzzâr.