Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 402 Hüküm no: 447 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Abbas’ın evini Debbâğzâde Hacı Hasan Vakfı’na istiğlal yolu ile sattığı Mahmiye-i İstanbul’da Debbâğzâde el-Hâc Hasan Mahallesi sükkânından Mehmed Efendi b. Abbas nâm kimesne meclis-i şer‘-i şerîf-i enverde zikri mürûr eden Debbâğzâde <> el-Hâc Hasan Vakfı’na bi’l-fi‘il mütevellî olan işbu hâfızü’l-kitâb İmâm Abdurrahman Efendi b. Hanîfî mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Pirinççi Sinan Mescid-i şerîfi müezzinine meşrûta olan menzil ve baʻzan yine İsa Efendi mu‘takası mülkü ve bir tarafdan Bakkālzâde odaları ve bir tarafdan Hoşâbcı İbrahim Çelebi mülkü ve bir tarafdan tarîk-i âm ile mahdûd hâricen ve dâhilen büyût-ı adîdeyi müştemil mülk menzilimi cümle tevâbi‘ ve levâhıkı ile mütevellî-i mezbûr Abdurrahman Efendi’ye yüz guruşa bi-tarîkı’l-istiğlâl bey‘ ve teslîm ol dahi vech-i meşrûh üzere iştirâ ve tesellüm ve kabz ve kabûl eyleyip semeni olan meblağ-ı mezbûru asl-ı mâl-ı vakf-ı mezbûrdan olmak üzere bana def‘ ü teslîm [61b] ben dahi yedinden ahz u kabz eylediğimden sonra mütevellî-i mezbûr Abdurrahman Efendi yine menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin on beş guruşa bana îcâr ve teslîm ben dahi ber-vech-i muharrer istîcâr ve kabûl eyledim dedikde gıbbe’t-tasdîkı’l-mer‘î mahalle-i mezbûre sâkinlerinden Osman Efendi b. Mustafa meclis-i şer‘-i şerîf-i enverde mütevellî-i merkūm Abdurrahman Efendi mahzarında ikrâr-ı tâm ve takrîr-i kelâm edip tarafeynden emr ve kabûlü hâviye kefâlet-i sahîha-i şer‘iyye ile derk-i menzil-i mezbûra ben kefîl oldum dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 6 min-Recebi’l-ferd sene 1121 Şuhûdü’l-hâl: Abdurrahman Efendi b. Abdulkādir, Mustafa Efendi el-Müezzin, el-Hâc Osman b. Ahmed, Seyfullah Çelebi b. Süleyman, Mehmed b. Mehmed, Mustafa Çelebi b. Şa‘ban, Mehmed Efendi b. Hasan, Ali Çelebi b. İvaz, Hasan b. Mustafa ve gayruhum mine’l-huzzâr.