Üsküdar Mahkemesi 14 Numaralı Sicil (H.953-955/ M. 1546-1549) cilt: 5, sayfa: 132 Hüküm no: 185 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tomay bt. Dimitri’nin Todora b. Yorgi’den istediği ev hissesinin verilmesi Vech-i tahrîr-i sicil budur ki Karye-i Akkilise’den Tomay bt. Dimo şerî‘at mahfilinde Todora b. Yorgi el-vasiyyü’l-muhtâr-ı eytâm Mihal muvâcehesinde takrîr-i da‘vâ kılıp eyitdi ki sen benim mülk-i meşrûh bir çatma evimi sen aldın hâliyâ taleb ederim dedikde mezbûr Todora şöyle cevâb verip eyitdi ki sen çatma evi bana verdin akçesine senin sâbık zevcin ile ağaç ve kiremit alıp bir ev binâ edip dedikde karye-i mezbûrdan Kiti b. Kosta ve Nikola b. Yani şehâdet edip dediler ki işbu zikr olunan evin hudûd bir taraf Mihal mülkü ile ve bir taraf Andon mülküne ve bir taraf Dimo ve bir taraf tarîk-i âm ile mahdûd olan evin nısf[ın] Tomay bt. Dimo’nun çatma evi için verip nısf-ı şâyi‘i mezbûre Tomay’a hükm olundu ki bi’t-taleb sicil olundu. Vaka‘a’t-tahrîr fî evâsıtı Zilka‘de sene 953. Şuhûdü’l-hâl: Çırak Mahmud b. Mehmed, Hasan b. Abdullah, Yorgi b. Elyo, Markova b. Kosta, Nikola b. Yorgi.