Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 407 Hüküm no: 455 Orijinal metin no: [62a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Mehmed’in kızı Fâtıma’nın nafakasından bir kısmını boşandığı kocası Ahmed’den alıp kalan kısmını ise taksitler halinde alacağı Mahmiye-i İstanbul’da İbrahim Paşa Mahallesiʼnde sâkine olup zâtı ta‘rîf-i şer‘î ile mu‘arrefe olan Ümmühani bt. Mehmed nâm hatun mahfil-i kazâda işbu bâ‘isü’l-kitâb Ahmed b. ( ) nâm kimesne mahzarında ikrâr ve takrîr-i kelâm edip mezbûr Ahmed zimmetinde yedimde olan hüccet-i şer‘iyye mantûku üzere bi-hakkı’l-hıdâne hacr u terbiyemde olan sulbiye sagīre kızı Fâtıma’nın nafaka-i mefrûza-i müstedânesinden müctemi‘ yirmi dört guruşun dört guruşunu bana def‘ ü teslîm ben dahi yedinden ahz u kabz eyleyip bâkī yirmi guruşu hâlen ve def‘aten edâya iktidârı olmamağla te’cîl ve taksîte tâlib olduğundan her otuz gün tamamında bana dörder guruş verip târih-i kitâbdan yüz elli gün tamamına değin tamamen edâ ve teslîm etmek üzere mezbûr Ahmed’i te’cîl ve taksît eylediğimde ol dahi ber-vech-i muharrer te’cîl ve taksît-i mezbûru kabûl ve meblağ-ı mezbûru müddet-i mezkûre tamamına değin edâya ta‘ahhüd eyledi dedikde gıbbe’t-tasdîkı’l-mer‘î mahmiye-i mezbûrede Silivrikapısı kurbünde Karabaş Mahallesiʼnde sâkin Mustafa b. Abdullah nâm kimesne mezbûre Ümmühani muvâcehesinde ikrâr ve takrîr-i kelâm edip meblağ-ı mukassat-ı mezkûra ber-minvâl-i muharrer emr ve kabûlü hâviye kefâlet-i sahîha-i şer‘iyye ile kefîl oldum dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Recebi’l-mürecceb sene 1121 Şuhûdü’l-hâl: Mustafa Çelebi b. Şa‘ban, Hasan b. Mustafa, Ali b. İvaz, Mehmed b. Ahmed, Ali b. Bâli, Abdülkerim b. Ahmed ve gayruhum mine’l-huzzâr.