Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 408 Hüküm no: 456 Orijinal metin no: [62a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı esnafından Ahmed b. Mehmed ve arkadaşlarının borçlu oldukları Şahne bt. Abdi’den Ahmed Çelebi b. Abdullah’a vermek üzere aldıkları parayı altmış gün sonra teslim edecekleri Kayıkcı tâifesinden Ahmed b. Mehmed ve İbrahim b. Mustafa ve Süleyman b. Mehmed ve Hasan b. Şa‘ban nâm kimesneler meclis-i şer‘de işbu râfi‘u’l-kitâb Ahmed Çelebi b. Abdullah nâm kimesne mahzarında her biri ikrâr ve takrîr-i kelâm edip işbu hâzıra bi’l-meclis Şâme bt. Hindi? nâm Nasrâniyeye zimmetimizde cihet-i deyn-i şer‘îden yetmiş iki guruş deynimiz olup ve mezbûre Şâme’nin dahi mezbûr Ahmed Çelebi’ye kezâlik cihet-i mezkûreden yetmiş iki guruş deyni olmağla bizim zimmetimizde olan meblağ-ı mezbûr yetmiş iki guruşu mezbûre Şâme cümlemiz bir meclisde iken mezbûr Ahmed Çelebi üzerine havâle-i sahîha-i şer‘iyye ile havâle eyledikde her birimiz minvâl-i muharrer üzere havâle-i mezbûreyi kabûl eylediğimizden sonra mezbûr Ahmed Çelebi’ye zimmetimizde [62b] min-ciheti’l-havâleti ale’l-iştirâk deynimiz olan meblağ-ı mezbûr yetmiş iki guruşu mezbûr Ahmed Çelebi târih-i kitâbdan altmış bir gün tamamına değin te’cîl eyledikde biz dahi baʻde’l-kabûl meblağ-ı mezbûru müddet-i mezbûre tamamına değin mezbûr Ahmed Çelebi’ye edâya her birimiz ta‘ahhüd eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Recebi’l-ferd sene 1121 Şuhûdü’l-hâl: Mustafa Çelebi b. Şa‘ban, Abdullah b. Abdullah, Hasan Çelebi b. Ahmed, İsmail b. Abdullah, Mustafa b. Ahmed, Ali b. İvaz, Mehmed Beşe b. Mehmed, Ali Beşe b. Bâli, Hasan Çelebi b. Abdullah ve gayruhum mine’l-huzzâr.