Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 409 Hüküm no: 457 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızlarının iftirası üzerine Hoca Üveys mahallesinden uzaklaştırılan Abdullah Çavuş b. Hasan ile hanımı Hayrülbenât bt. Osman’ın tekrar mahallelerinde ikametlerine izin verildiği Efendi imzâsıyladır. Mahmiye-i İstanbul’da Hoca Üveys Mahallesi sâkinlerinden Abdullah Çavuş b. Hasan ile zevcesi Hayrülbenât bt. Osman nâm hatun meclis-i şer‘-i şerîfde takrîr-i kelâm ve tâʻbir ani’l-merâm edip kızımız işbu hâzıratü bi’l-meclis Âişe Hatun baʻzı kimesnelerin iğvâsıyla üvey babam bana ulaşdı deyü iftirâ etmekle mezbûr Abdullah Çavuş’un esâmesi çalınıp mahalleden ihrâc olundukdan sonra hâlâ der-i devlete arzuhâl ettiğimizde keyfiyet-i hâlimiz suâl ve i‘lâm olunmak bâbında fermân-ı âlî sâdır olmağla mahalle-i mezbûre imâmı ve müezzini ve zeyl-i kitâbda muharrerü’l-esâmî olan bî-garaz kimesneler hüsn-i hâlimizi ihbâr ve mezbûre Âişe hiffet-i aklım olmağla baʻzı nâsın iğvâsıyla iftirâ etmişidim deyü meclis-i şer‘de i‘tirâfı ve hüsn-i hâlimizi ihbârları bâ-fermân-ı âlî i‘lâm ve yine menzilimizde iskân olunmasını Müslimîn-i mezkûrînin iltimâsları taraf-ı şer‘den inhâ olundukda i‘lâm mûcebince amel olunmak bâbında yedimize fermân ihsân buyrulmağla ke’l-evvel menzilimizde iskân olunmamıza kıbel-i şer‘den hüccet dahi verilmek matlûbumuzdur deyü mazmûnu takrîrlerine muvâfık fermân-ı şerîf ibrâz etmeğin mûcebince mezbûrânın ke’l-evvel menzillerinde sâkinler olduklarına kimesne mâni‘ olmamak üzere işbu vesîka-i enîka ketb ü terkīm olundu. Fî 27 min-Rebîʻülâhir sene 1121 Şuhûdü’l-hâl: Mustafa Efendi el-İmâm, es-Seyyid İsmail Çelebi el-Müezzin, Mustafa Efendi b. Ömer, es-Seyyid Mehmed Efendi b. Mehmed, Ahmed Çavuş, Mustafa Çelebi b. Ali, el-Hâc Hüseyin b. Mustafa, Musa b. Mustafa, Hasan b. İbrahim, Hasan b. Hüseyin, Mehmed Yazıcı b. İsmail, İbrahim b. Selim ve gayruhum mine’l-huzzâr.