Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 409 Hüküm no: 458 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe bt. Abdullah b. Abdurrahman’ın boşandığı kocası Ahmed b. Mustafa’daki mehir, nafaka ve diğer alacaklarını alıp zimmetini ibra ettiği Mahmiye-i İstanbul’da Mesîh Hasanpaşa Mahallesiʼnde sâkine Habibe bt. Abdullah b. Abdurrahman nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Mehmed Çelebi b. Halil ve Resul Çelebi b. Ali nâm kimesneler şehâdetleriyle şer‘an sâbit olan Müezzin Mustafa Efendi b. Abdülaziz nâm kimesne meclis-i şer‘-i şerîf-i enverde müvekkile-i mezbûrenin zevc-i dâhili işbu râfi‘u’l-kitâb Ahmed b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûreyi merkūm Ahmed târih-i kitâb günü bâyinen tatlîk etmekle zimmetinde mütekarrer ve ma‘kūdün-aleyh olan yirmi guruş mehr-i müeccelinin on beş guruşunu mukaddemâ hibe-i sahîha-i şer‘iyye ile hibe edip bâkī beş guruş mehr-i müecceli ile iddet-i nafaka ve meûnet-i süknâsiʼçün bi’t-terâzî ta‘yîn olunan beş guruş ki cem‘an on guruşu zevci mezbûr Ahmed yedinden tamamen ahz u kabz edip husûs-ı mezbûra ve sâir târih-i kitâba gelince beynlerinde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan zevci mezbûr Ahmed’in zimmetini ibrâ-i âm ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 min-Recebi’l-ferd sene 1121 Şuhûdü’l-hâl: Resul Çelebi b. Mustafa, Mustafa Çelebi b. Muharrem, Mustafa Çelebi b. Abdullah, Hüseyin b. Ahmed, Seyfullah b. Süleyman ve gayruhum mine’l-huzzâr.