Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 410 Hüküm no: 459 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed b. Ferhad’ın Haremeyn Vakfı’ndan olan evini Abdullah Ağa vasıtasıyla sattığı Şa‘ban Efendi b. Mustafa’da alacağı olduğu iddiasıyla açtığı davada sulh olarak Abdullah Ağa ve Şa‘ban Efendi’nin zimmetlerini ibra ettiği Mahmiye-i İstanbul’da Yavaşça Şahin Mahallesiʼnde sâkin el-Hâc Ahmed b. Ferhad nâm kimesne mahfil-i kazâda işbu râfi‘u’l-kitâb Şa‘ban Efendi b. Mustafa nâm kimesne mahzarında ikrâr ve takrîr-i kelâm edip Haremeyni’ş-şerîfeyn Vakfı’ndan olup mahalle-i mezbûrda vâki‘ etrâf-ı erba‘ası el-Hâc Süleyman ve Yusuf Yazıcı ve Abdullah Ağa ve Kaşıkçı Ömer mülkleri ile mahdûd ve tasarrufunda olan büyût-ı adîdeyi müştemil menzilimi işbu Abdullah Ağa b. ( ) vesâtetiyle iki bin yüz guruş bedel mukābelesinde mezbûr Şa‘ban Efendi’ye bâ-izn-i mütevellî bundan akdem ferağ ve tefvîz ol dahi ba‘de’t-tefevvüz ve kabûl meblağ-ı mezbûrun iki bin guruşunu ahz ve istîfâ edip yüz guruşunu dahi mezbûr Şa‘ban Efendi’den taleb ve da‘vâ ettiğimde ol dahi cevâbında mezbûr Abdullah Ağa vesâtetiyle meblağ-ı mezbûr yüz guruşu emrin ile vakf-ı mezbûr mütevellîsine verilmişidi demekle beynimizde nizâ‘-ı küllî vukū‘undan sonra muslihûn tavassut edip mezbûr Şa‘ban Efendi da‘vâ-yı mezkûrumdan benim ile otuz guruşa sulh oldukda ben dahi sulh-ı mezbûru kabûl ve bedel-i sulh olan otuz guruşu mezbûr Şa‘ban Efendi’den tamamen ahz u kabz ettiğimden sonra menzil-i mezkûra ve bedel-i merkūma müte‘allika cemî‘ de‘âvî ve mutâlebâtdan mezbûrân Şa‘ban Efendi ve Abdullah Ağa’nın zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî-selhi min-Cemâziyelâhir li-sene 1121 Şuhûdü’l-hâl: Mehmed Efendi b. Hamza, İsmail Efendi b. Receb, es-Seyyid Mustafa Çelebi b. Ahmed, Mustafa Çelebi b. Mehmed, Mehmed Çelebi b. Mustafa, İbrahim Efendi.