Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 411 Hüküm no: 460 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatib Mehmed Efendi b. Hüseyin kendisinden haksız yere parasını alan Çankırı Valisi Polad Paşazâde İsmail Paşa’nın adamlarından Seyyid Hüseyin Çelebi b. Ali’nin parayı geri ödemesi Vilâyet-i Anadolu’da Kengiri [Çankırı] kasabası ahâlîsinden işbu râfi‘u’l-vesîka Hatîb Mehmed Efendi b. Hüseyin [Hasan] nâm kimesne mahfil-i kazâda Kengiri [Çankırı] vâlîsi Polad Paşazâde İsmail Paşa’nın etbâ‘ından es-Seyyid Hüseyin Çelebi b. Ali nâm kimesne mahzarında ikrâr-ı deyne da‘vâ ve takrîr-i kelâm edip mezbûr İsmail Paşa emred olan oğullarım işbu Abdurrahman ve Mehmed’i fuzûlen götürüp ba‘dehû şefâ‘at ile oğullarımı mezbûr es-Seyyid Hasan ile bana irsâl eyledikde mezbûr es-Seyyid Hasan hizmet nâmıyla benim seksen dört guruşumu bi-gayr-ı hakkın ahz u kabz etmekle suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup medîne-i Kengiri [Çankırı] ahâlîsinden Mehmed Bey b. Mustafa ve Ali Bey b. Hasan nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka mezbûr es-Seyyid Hasan bundan akdem vech-i meşrûh üzere müdde‘î-i mezbûrun oğulları mezbûrân Mehmed ve Abdurrahman’ı müdde‘î-i mezbûra götürdüğünde hizmet akçesi [de]yu müdde‘î-i mezbûrun seksen dört guruşunu mezbûr es-Seyyid Hasan bizim huzûrumuzda bi-gayr-ı hakkın ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr seksen dört guruşu müdde‘î-i mezbûra edâya mezbûr es-Seyyid Hasan’a tenbîh-birle mâ-vaka‘a bi’t-taleb ketb olundu. [Fî] gurre-i Recebi’l-ferd li-sene 1121 Şuhûdü’l-hâl: Molla Osman b. ( ), Molla Mahmud b. ( ), Ali Efendi b. ( ), Molla Hasan b. ( ) ve gayruhum mine’l-huzzâr.