Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 412 Hüküm no: 461 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hüseyin ile Hüseyin b. Yunus’un Çukurbostan’daki evlerini Fazlullah Beşe b. Hasan’a sattıkları Mahmiye-i İstanbul’da merhûm ve mağfûrun-leh Sultan Selim Hân Câmi‘-i şerîfi kurbünde vâki‘ Çukurbostan Mahallesiʼnde sâkin Mustafa b. Hüseyin ve li-ümmin karındaşı Hüseyin b. Yunus nâm kimesneler meclis-i şer‘de işbu bâ‘isü’l-kitâb Fazlullah Beşe b. Hasan nâm kimesne mahzarında her biri ikrâr-ı ve takrîr-i kelâm edip akd-i âti’z-zikrin sudûruna değin ale’l-iştirâki’s-seviyy silk-i mülkümüzde münselik olup mahalle-i mezbûrede vâki‘ bir tarafdan Zülfikār Ağa odaları ve bir tarafdan baʻzan Âişe Hatun mülkü ve baʻzan el-Hâc Abdülaziz mülkü ve bir tarafdan mahalle-i mezbûre imâmına meşrûta vakıf menzil ve bir tarafdan tarîk-i hâs ile mahdûd fevkānî ve tahtânî iki bâb odaları ve bir kenîfi müştemil mülk menzilimizi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz yirmi guruşa mezbûr Fazlullah Beşe’ye bey‘ ve temlîk ve teslîm eylediğimizde ol dahi vech-i muharrer üzere iştirâ ve temellük ve kabz ve kabûl eylediğinden sonra semeni olan meblağ-ı mezbûr yüz yirmi guruşu mezbûr Fazlullah Beşe yedinden bi-kadri’l-hısas tamamen ahz u kabz eyledik baʻde’l-yevm menzil-i mahdûd-ı mezkûr cemî‘ müştemilâtıyla mezbûr Fazlullah Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 10 min-Recebi’l-ferd sene 1121 Şuhûdü’l-hâl: Abdullah Efendi b. Ali el-İmâm, Mehmed Çelebi b. İbrahim, Mehmed Halîfe b. Ali el-Müezzin, Attâr İsmail Çelebi b. Mehmed, Mustafa Beşe b. Mehmed, Ali Baba b. Abdullah, Ustazâde Mustafa Ağa b. Mehmed, Mehmed b. Veli, Monla Ali b. Mustafa, Abdullah b. Mustafa, Abdülkerim b. Ahmed ve gayruhum mine’l-huzzâr.