Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 412 Hüküm no: 462 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarsuslu Yusuf b. Sefer’in Adana Valisi Mustafa Paşa’nın damadı Sipâhî Mehmed Efendi’ye verdiği rüşvet parasının tahsili için açtığı davada sulh olup zimmetini ibra ettiği Vilâyet-i Anadolu’da medîne-i Tarsus ahâlîsinden Yusuf b. Sefer nâm kimesne mahfil-i kazâda işbu râfi‘u’l-vesîka Sipâhî Mehmed Efendi b. Ali nâm kimesne mahzarında ikrâr ve takrîr-i kelâm edip târih-i kitâbdan dokuz sene mukaddem el-Hâc Mustafa Paşa Adana vâlîsi iken mezbûr Sipâhî Mehmed Efendi dâmadı olmağla paşa-yı mezbûrun habsinden oğlum Osman’ı tahlîs eyle deyü bi-tarîkı’r-rüşve mezbûr Mehmed Efendi’ye yüz elli guruş ile beynimizde ma‘lûm iki atımı def‘ ü teslîm ol dahi kabz etmekle husûs-ı mezbûru mezbûrdan da‘vâ ettiğimde ol dahi inkâr etmeğin mezbûr Sipâhî Mehmed Efendi da‘vâ-yı mezkûremden benimle doksan iki guruş üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr doksan iki guruşu mezbûr Sipâhî Mehmed Efendi yedinden ahz u kabz ettiğimden sonra husûs-ı mersûma müte‘allika cemî‘ da‘vâdan mezkûr Sipâhî Mehmed’in zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Cumâdelâhire sene 1121 Şuhûdü’l-hâl: Mehmed Efendi b. Mustafa, İbrahim Çelebi el-Mütevellî, Süleyman Çelebi, Halil Beşe, İbrahim Beşe b. Hüseyin el-Mübâşir ve gayruhum mine’l-huzzâr.