Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 413 Hüküm no: 463 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İbrahim’in geçinemediği kocası Abdi b. Yusuf’dan boşandığı Mahmiye-i İstanbul’da Tercümân Yunus Mahallesi sâkinelerinden olup zâtı mahalle-i mezbûre ahâlîsinden Mehmed b. Ali ve diğer Mehmed b. Mustafa nâm kimesneler ta‘rîfleriyle mu‘arrefe ve bülûğuna mu‘terife olan Fâtıma bt. İbrahim meclis-i şer‘-i şerîf-i enverde zevc-i dâhili bâ‘isü hâze’l-kitâb Abdi b. Yusuf nâm kimesne mahzarında ikrâr-ı tâm ve takrîr-i kelâm edip mezbûr Abdi zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Abdi ile <> hul‘ olduğumda ol dahi hul‘-ı mezbûru <> ber-vech-i muharrer kabûl eylediğinden sonra hukūk-ı zevciyete ve sâir beynlerinde cereyân eden ahz u i‘tâya müte‘allika âmme-i de‘âvî ve mutâlebât ve eymân ve muhâsamâtdan her biri âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dediklerinde ahadühumâ birbirlerini tahkīk ve tasdîk etmeğin mâ-vaka‘a bi’t-taleb ketb olundu. Fî 10 min-Recebi’l-ferd sene 1121 Şuhûdü’l-hâl: el-Hâc Süleyman b. Abbas, Mehmed Çelebi b. Mehmed, Mehmed Çelebi b. Abdullah, Mustafa Çelebi Galatalı ve gayruhum mine’l-huzzâr.