Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 416 Hüküm no: 468 Orijinal metin no: [63b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Receb’in vârislerinin vekili kardeşi Ahmed b. Receb’in terekeyi Ahmed Efendi b. Mehmed’den teslim aldığı Fi’l-asl vilâyet-i Anadolu’da Bayburd-ı Erzurum kazâsına tâbi‘ Hanus nâm karye ahâlîsinden olup mahmiye-i İstanbul’da Kirmasti mahallesinde mütemekkin iken bundan akdem vefât eden Ömer b. Receb nâm kimesnenin li-ebeveyn karındaşı ve vârisi ve âhar karındaşları Mustafa ve Ali ve Ümmühani taraflarından dahi vech-i âtî üzere vekîl olduğunu iddi‘â eden işbu râfi‘u’l-kitâb Ahmed b. Receb nâm kimesne mahfil-i kazâda müteveffâ-i mezbûrun terekesini hıfz ve veresesine îsâle vasiyy-i muhtârı olup terekesine vaz‘-ı yedi mütehakkık olan Ahmed Efendi b. Mehmed nâm kimesne mahzarında üzerine da‘vâ ve takrîr-i kelâm edip ben ve karındaşlarım gāibûn ani’l-meclis Mustafa ve Ali ve Ümmühani müteveffâ-i mezbûr Ömer ile li-ebeveyn karındaşlar olup hattâ babamız ismi mezbûr Receb ve ceddimiz ismi Osman ve vâlidemiz ismi Emine bt Ömer ve maskat-ı re’sleri zikr olunan Hanus karyesidir müteveffâ-i mezbûr Ömer’in verâseti mezbûrûna münhasıra olup bunlardan gayrı vârisi ve terekesine müstehakk-ı âhar olduğu ma‘lûmumuz <> olmayıp ve gāibûn-ı merkūmûn Mustafa ve Ali ve Ümmühani müteveffâ-i mezbûrun terekesinden hisselerini vâzı‘u’l-yed olan merkūm Ahmed Efendi’den ve sâir vâzı‘u’l-yed olanlardan taleb ve da‘vâ ve ahz u kabza ve kendilere îsâle ve bunlar[ın] mütevakkıf olduğu umûrun küllîsine taraflarından karındaşları müdde‘î-i mezbûr Ahmed’i bizim huzûrumuzda her biri vekîl ve nâib-i menâb nasb u ta‘yîn eylediklerinde ol dahi vekâlet-i mezbûreyi kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i [64a] şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm ve’t-tenbîh müdde‘î-i mezbûr Ahmed meclis-i mezkûrda merkūm Ahmed Efendi muvâcehesinde ikrâr ve takrîr-i kelâm edip müteveffâ-i mezbûrun terekesinden olup teslîmine tenbîh-i şer‘î olunan dört bin yedi yüz kırk altı akçe ve kırk dört Frengî altın ve dört tuğralı altını vasiyy-i mezbûr Ahmed Efendi yedinden bi’l-asâle ve bi’l-vekâle tamamen ahz u kabz edip husûs-ı mîrâsa müte‘allika âmme-i da‘vâdan mezbûr Ahmed Efendi’nin bi’l-asâle ve bi’l-vekâle zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-Recebi’l-ferd sene 1121 Şuhûdü’l-hâl: Mehmed Çelebi b. Ali, Hamza Beşe b. el-Hâc Mehmed, Mustafa Çelebi b. Şa‘ban, Ali Çelebi b. İvaz, Ahmed Çelebi b. Süleyman ve gayruhum mine’l-huzzâr.