Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 417 Hüküm no: 469 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah Efendi b. Seyyid Ahmed Efendi’nin Mehmed Efendi b. Abdullah’a verdiği borca kefil olan Mustafa Çelebi b. Mehmed’in borcu ödemesi Mahmiye-i İstanbul’da Hasan Halîfe Mahallesiʼnde sâkin işbu râfi‘u’l-vesîka es-Seyyid Abdurrahim Efendi b. es-Seyyid Ahmed Efendi nâm kimesne mahfil-i kazâda Mustafa Çelebi b. Mehmed nâm kimesne mahzarında üzerine da‘vâ ve takrîr-i kelâm edip mezbûr Mustafa Çelebi gāib ani’l-meclis Mehmed Efendi b. Abdullah nâm kimesne zimmetinde cihet-i deyn-i şer‘îden bâ-temessük seksen guruş bâkī hakkıma tarafeynden emr ve kabûlü hâviye kefâlet-i sahîha-i şer‘iyye ile kefîl olup ve ber-vech-i muharrer kefâletini temessük-ı mezbûra şerh edip ve mühürleyip ve meblağ-ı mezbûr cihet-i kefâletden merkūm Mustafa Çelebi’nin deyni olmağla hâlâ taleb ederim suâl olunup alıverilmesi matlûbumdur dedikde gıbbe’s-suâl merkūm Mustafa Çelebi cevâbında fi’l-vâki‘ meblağ-ı mezbûra kefîl olmuşidim lâkin müdde‘î-i mezbûr es-Seyyid Abdurrahim Efendi meblağ-ı mezbûru senden da‘vâ etmem sen kefîlim deyü temessüğü mühürle ve ber-vech-i muharrer muvâza‘aten ikrâr eyle deyü benimle ittifâk edip ben dahi ber-vech-i muharrer mezbûrun kavline mağrûren muvâza‘aten kefîl bi’l-mâlım deyü ikrâr edip ve temessüğü mühürledim meblağ-ı mezbûra hakīkatde kefîl değilim deyü def‘le mukābele edicek gıbbe’l-istintak ve’l-inkâr mezbûr Mustafa’dan def‘-i mezkûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ meblağ-ı mezbûru senden da‘vâ etmem deyü merkūm Mustafa’yı iğrâ etmeyip ol dahi ber-vech-i muharrer muvâza‘aten kefîl olmadığına müdde‘î-i mezbûra yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-a‘lâ etmeğin mûcebiyle baʻde’l-hükm ve’t-tenbîh mâ-vaka‘a bi’t-taleb ketb olundu. Fî 12 min-Recebi’l-ferd sene 1121 Şuhûdü’l-hâl: Hüseyin b. Abdullah, Hasan b. Mustafa, es-Seyyid Salih Efendi b. es-Seyyid Ahmed Efendi, Mustafa Efendi b. Mehmed el-Kādı ve gayruhum mine’l-huzzâr.