Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 417 Hüküm no: 470 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Yamandi v. Rafail’in değirmenindeki bargirlerini ve aletlerinin yarısın Markos v. Norsiz’e sattığı Uncu tâifesinden Yamandi v. Rafail nâm zimmî mahfil-i kazâda işbu râfi‘u’s-sifr Markos v. Norsiz nâm zimmî muvâcehesinde ikrâr ve takrîr-i kelâm edip eşyâ-i memlûkemden olup mahmiye-i İstanbul’da Ayvansarıkapısı [Ayvansaray] dâhilinde Koca Mustafa Paşa Mahallesiʼnde vâki‘ el-Hâc Abdullah değirmeninde mevcûd beynimizde ilm-i şer‘î ile ma‘lûm on yedi re’s bârgir ve sâir değirmen âlâtımın nısfını mezbûr Markos’a tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yüz elli guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük eylediğinden sonra semeni olan meblağ-ı mezbûr yüz elli guruşu mezbûr Markos yedinden tamamen ahz u kabz eyledim baʻde’l-yevm mârru’z--zikr on yedi re’s bârgir ve âlât-ı ma‘lûmenin nısfı mezbûr Markos’un mülk-i müşterâsıdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-Recebi’l-ferd sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Ali Çelebi b. Bâli, Süleyman b. Abdullah ve gayruhum mine’l-huzzâr.