Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 418 Hüküm no: 471 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azam v. Can’ın kölesi olduğu iddiasıyla Yorgi v. Dimitri’ye açtığı davadan feragat ettiği Efendi hazretleri imzâsıyladır. Mahmiye-i İstanbul’da Abdi Subaşı Mahallesiʼnde sâkin Azam v. Can nâm zimmî mahfil-i kazâda işbu râfi‘u’s-sifr Yorgi v. Dimitri nâm zimmî mahzarında ikrâr ve takrîr-i kelâm edip mezbûr Yorgi için benim abd-i memlûkümdür deyü bundan akdem da‘vâ ettiğimde ol dahi ben senin kayın anan Kaliçe nâm Nasrâniyenin mülkü idim merkūm Kaliçe yedimde olan hüccet nâtıka olduğu üzere bundan akdem beni mâlından tahrîr ve i‘tâk etmişidi deyü hüccet ibrâz etmekle beynimizde nizâ‘-ı küllî vâki‘ olmuş idi el-hâletü hâzihî baʻde’l-yevm da‘vâ-yı mezkûremden fâriğ oldum benim mülküm ise de âzâd olsun ve târih-i kitâba gelince cemî‘ ahz u i‘tâ ve mu‘âmelât-ı şettâya müte‘allika da‘vâdan her birimiz âharın zimmetini ibrâ edip min-ba‘d merkūm Yorgi ile da‘vâ ve nizâ‘ım kalmadı dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 5 min-Recebi’l-mürecceb sene 1121 Şuhûdü’l-hâl: Mehmed Çavuş el-Mübâşir, Ahmed b. Mehmed, Attâr Ahmed Çelebi, Ebûbekir b. Mehmed, Mehmed Beşe, Ahmed b. Mehmed, Kasab Mustafa Beşe, Himmet Beşe ve gayruhum mine’l-huzzâr.