Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 418 Hüküm no: 472 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Halil b. Mustafa’nın vârislerinden kızı Emine ile oğlu Seyyid Abdullah’ın hisselerine düşen Çakır Ağa mahallesindeki evi Seyyid Abdullah Çelebi’ye sattıkları Mahmiye-i İstanbul’da Çakır Ağa Mahallesi ahâlîlerinden olup tarîk-i hacc-ı şerîfde bundan akdem fevt olan el-Hâc Halil b. Mustafa nâm kimesnenin verâseti zevce-i metrûkesi Âişe bt. Mustafa nâm hatun ile sulbiye kebîre kızı Emine’ye ve sulbî kebîr oğulları es-Seyyid Abdullah ve es-Seyyid Süleyman’a münhasıra ve tashîh-i mes’eleleri kırk sehmden olup sihâm-ı mezbûreden beş sehmi mezbûre Âişe Hatun’a ve yedi sehmi merkūme Emine Hatun’a ve on dörder sehmi mezbûrân es-Seyyid Abdullah ile ve es-Seyyid Süleyman’dan her birine isâbet ve intikāl eylediği şer‘an zâhir ve mütehakkık oldukdan sonra mezbûr es-Seyyid Süleyman asâleten ve mezbûre Emine tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân el-Hâc Hasan b. Mehmed ve diğer Mehmed b. Mustafa şehâdetleriyle şer‘an sâbit olan el-Hâc Ahmed b. Mustafa vekâleten meclis-i şer‘-i şerîf-i enverde işbu râfi‘u’l-kitâb [64b] mezbûr es-Seyyid Abdullah Çelebi mahzarında her biri bi’l-asâle ve bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Şa‘ban Çelebi mülkü ve bir tarafdan Monla Mehmed mülkü ve bir tarafdan baʻzan Canbaz Ali ve baʻzan Âişe Hatun mülkleri ve bir tarafdan tarîk-i âm ile mahdûd üç bâb fevkānî oda ve bir sofa ve iki bâb tahtânî oda ve kenîf ve bir kuyu ve havluyu müştemil mülk menzil ile’l-vefât mûrisimiz müteveffâ-i mezbûrun yedinde mülkü olup ba‘de vefâtihi tashîh-i mezbûr üzere bize isâbet etmekle hâlâ menzil-i mahdûd-ı mezbûru cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm es-Seyyid Abdullah Çelebi’ye asâleten ve vekâleten iki yüz yetmiş guruşa bey‘ ve teslîm ve temlîk edip ol dahi vech-i meşrûh üzere iştirâ ve tesellüm ve kabz ve kabûl eylediğinden sonra semeni olan meblağ-ı mezbûru asâleten ve vekâleten merkūm es-Seyyid Abdullah Çelebi yedinden bi-kadri’l-hısas tamamen ahz u kabz eyledik baʻde’l-yevm menzil-i mahdûd-ı mezbûrda benim ve müvekkilem mezbûre Emine Hatun’un kat‘â alâka ve medhali kalmayıp merkūm es-Seyyid Abdullah Çelebi’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-Recebi’l-ferd sene 1121 Şuhûdü’l-hâl: el-Hâc Davud b. Abdullah, el-Hâc Mehmed b. Abdurrahman, el-Hâc Hasan [b.] Mehmed, Mustafa Çelebi b. Şa‘ban ve gayruhum mine’l-huzzâr.