Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 419 Hüküm no: 473 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Abdüllatif b. Hacı Selahaddin’in Hacı Bektaş b. Esad’a ait Haleb’deki sabunhanenin senelik kirasından kalan alacağının Hacı Bektaş tarafından ödenmesi Mahmiye-i İstanbul’da Mercan Çarşısı kurbünde İmâm Ali hanında sâkin işbu râfi‘u’l-kitâb el-Hâc Abdüllatif b. el-Hâc Selahaddin nâm kimesne meclis-i şer‘-i şerîf-i enverde el-Hâc Bektaş b. Esad nâm kimesne mahzarında üzerine da‘vâ ve takrîr-i kelâm edip mezbûr el-Hâc Bektaş Haremeyn-i muhteremeyn evkāfından olup medîne-i Halebü’ş-şehbâ’da vâki‘ taht-ı icâresinde olan sabunhânenin senevî altı yüz guruş icâresini evkāf-ı mezbûre zâbitleri yediyle mahalline irsâl edegelmekle bundan akdem bin yüz on dokuz senesine mahsûb olmak üzere bir senelik altı yüz guruş icâreyi mahalline îsâl için sene-i mezbûrede surre emîni olan Mustafa Efendi’ye vermek üzere bi-şartü’r-rücû‘ bana emr edip ben dahi meblağ-ı mezbûr altı yüz guruşu târih-i mezbûrda surre emîni olan merkūm Mustafa Efendi’ye bi’t-tamam teslîm eylediğimden sonra merkūm el-Hâc Bektaş meblağ-ı mezbûrun beş yüz guruşunu bana teslîm ben dahi yedinden ahz u kabz edip meblağ-ı mezbûrun altmış guruşu bâkī zimmetinde kalmağın hâlâ meblağ-ı bâkī-i mezbûr altmış guruşu dahi bi-tarîkı’l-mürâca‘a taleb ederim suâl olunsun dedikde gıbbe’s-suâl mezkûr el-Hâc Bektaş cevâbında fi’l-vâki‘ müdde‘î-i mezbûra emr edip ol dahi meblağ-ı mezbûru emrine binâen emîn-i mezbûr Mustafa Efendi’ye bi’t-tamam teslîm eylediğini ikrâr u i‘tirâf edip lâkin kabzını mu‘terif olduğu beş yüz kırk guruşdan bâkī altmış guruş dahi kendiye teslîm eyledim deyü def‘le mukābele edicek gıbbe’l-istintak ve’l-inkâr mezbûr el-Hâc Bektaş’dan def‘-i mezkûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka kabzını mu‘terif olduğu meblağ-ı mezbûr beş yüz kırk guruşdan mâ‘adâ altmış guruşu dahi merkūm el-Hâc Bektaş’dan ahz u kabz etmediğine mezbûr el-Hâc Abdüllatif’e yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-a‘lâ etmeğin mûcebince meblağ-ı bâkī-i merkūm altmış guruşu müdde‘î-i mezbûra edâ ve teslîme mezbûr el-Hâc Bektaş’a tenbîh-birle mâ-vaka‘a bi’t-taleb ketb olundu. Fî 15 min-Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Hasan Çelebi b. Mustafa, Hasan Çelebi b. Abdullah, Süleyman b. Abdullah, Ali Çelebi b. İvaz ve gayruhum mine’l-huzzâr.