Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 420 Hüküm no: 474 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haydarî Hacı Hüseyin Tekkesi vakfından olan Haydarhâne mahallesindeki dokuz oda, menzil ve bahçe arsası ile Baba Mahmud Darülhadis’i arsasının kiralarına tekke civarındaki mescid vakfı mütevellîsinin müdahale etmemesi Ta‘allaka bimâ-fîhi nazaru’l-fakīr Mustafa el-Kādı bi-asâkir-i Rumeli ufiye anhü Ta‘allaka bimâ-fîhi nazaru’l-abdi’l-fakīri ileyhi sübhânehû Mecdî Mehmed el-Kādı bi-asâkir-i Anadolu ufiye anhü Mâ fîhi kemâ-yahvîhî nemekahü’l-fakīru ileyhi sübhânehû Ebû İshak İsmail el-Kādı bi-Dârü’l-aliyyeti Kostantıniyyeti’l-mahmiye ufiye anhü Mahmiye-i İstanbul’da Haydarhâne Mahallesiʼnde vâki‘ Haydarî Hacı Hüseyin Tekyesi’nin şeyhi ve vakfının mütevellîsi olan bâ‘isü hâze’l-kitâb es-Seyyid Şeyh Hüseyin Efendi b. es-Seyyid Mahmud nâm kimesne meclis-i şer‘-i şerîf-i enverde tekye-i mezkûre kurbünde vâki‘ yine vakf-ı mezbûrdan olan mescid-i şerîfin mütevellîsi olan Mehmed b. İbrahim nâm kimesne mahzarında üzerine da‘vâ ve takrîr-i kelâm edip tekye-i mezkûre etrâfında vâki‘ Fâtıma Hatun ve es-Seyyid Ahmed Çelebi ve Havvâ Hatun ve Mehterbaşı İbrahim Ağa ve Tavukçu kızı Fâtıma Hatun ve Ahmed Beşe ve diğer Fâtıma Hatun ve Râbia Hatun ve Ali Halîfe tasarruflarından olan dokuz bâb odalar ile tekye-i mezbûre şeyhine meşrûta menzil ve sedli bahçe arsası ve Baba Mahmud Efendi Dârü’l-hadîsi arsası tekye-i mezbûre havâicine mu‘ayyen akārâtından olup elli seneden mütecâviz zikri mürûr eden oda ve bahçe ve Dârü’l-hadîs arsaları mukāta‘asını zâviye-i mezbûre şeyhi ve mütevellîsi olanlar ahz u kabz ve tekye-i mezbûre mesârifine sarf edegelmişler iken hâlâ mescid-i mezbûr mütevellîsi merkūm Mehmed mescid-i merkūm vakfından olmak üzere zikr olunan dokuz bâb odalar ile bahçe ve Dârü’l-hadîs arsalarını îcâr ve mukāta‘alarını fuzûlen ahz u kabz [65a] etmişdir suâl olunup kasr-ı yedine tenbîh olunmak matlûbumdur dedikde gıbbe’s-suâl mütevellî-i mezbûr Mehmed cevâbında ber-vech-i muharrer sâlifü’z-zikr dokuz bâb odalar ile bahçe ve Dârü’l-hadîs arsaları mescid-i mezbûr vakfından olmak üzere zabt ve icâre ve mukāta‘alarını mescid-i mezbûr vakfı olmak üzere ahz u kabz eylediğini ikrâr lâkin zikr olunan odalar ve menzil ve bahçe ve Dârü’l-hadîs arsası zikri mürûr eden tekye vakfı olup elli seneden mütecâviz tekye-i mezbûre mütevellîsi ve şeyhi olanlar ahz u kabz edegeldiklerini inkâr edicek müdde‘î-i mezbûr es-Seyyid Şeyh Hüseyin Efendi’den müdde‘âsını mübeyyine beyyine taleb olundukda udûl-i ricâlden ve müsinn ü ihtiyârlarından Muhtesib Karagöz Mahallesi imâmı Mustafa Efendi b. Abdülbâki ve Emin Nureddin Mahallesi sükkânından Hüsameddin Efendi b. Ali ve el-Hâc Koca Mahallesi sükkânından es-Seyyid el-Hâc Hüseyin b. Mustafa ve es-Seyyid Ahmed Çelebi b. Mustafa ve yine Muhtesib Karagöz mahallesinden Hüseyin Çelebi b. Mustafa ve es-Seyyid Hasan b. Mehmed nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-hakīka merhûm Haydarî el-Hâc Hüseyin Vakfı olup tekye-i mezbûre civârında olan sâlifü’z-zikr Fâtıma Hatun ve es-Seyyid Ahmed Çelebi ve Havvâ Hatun ve Mehterbaşı İbrahim Ağa ve Tavukçu kızı diğer Fâtıma ve Ahmed Beşe ve diğer Fâtıma Hatun ve Râbia ve Ali Halîfe tasarruflarında olan dokuz bâb odaların icârelerini ve tekye-i mezbûre şeyhine meşrûta menzil ve bahçe arsasının ve Baba Mahmud Efendi Dârü’l-hadîsi arsasının mukāta‘alarını tekye-i mezbûrenin sâbıkā şeyhi olan Ahmed Efendi ve ba‘dehû şeyhi olan işbu mezbûr es-Seyyid Şeyh Hüseyin Efendi elli seneden mütecâviz ahz u kabz edip tekye-i mezbûre mesârifine sarf edegelmişlerdir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm mâ-vaka‘a bi’t-taleb ketb olundu. Fî-gurreti şehri Rebîʻülâhir sene 1121 Şuhûdü’l-hâl: Fahrü’l-müderrisîn Mahmud Efendi Hoca-i Saray-ı atîk, el-Hâc Mustafa Ağa b. Mehmed İbşirzâde, Ali Çelebi b. Hasan Kethüdâ-yı solaklar, es-Seyyid Mustafa Çavuş b. el-Hafîd, Mehmed Efendi b. Abdüllatif, Mustafa Çelebi b. Mehmed Efendi, Çadırcı el-Hâc Ahmed Çelebi b. Abdurrahman, el-Hâc Hüseyin Efendi el-Hatîb, Ahmed Çelebi b. Mehmed, Zâkir İbrahim Efendi b. İlyas, Ebûbekir Efendi b. Mehmed Efendi, es-Seyyid Ahmed Çelebi b. es-Seyyid Mehmed Çelebi, Berber Süleyman Çelebi b. Ahmed Beşe, es-Seyyid İdris Ağa Karahisâr-ı şarkī, Mehmed Beşe b. Abdulkādir, es-Seyyid Ömer Ağa b. es-Seyyid Mehmed Ağa, Mahmud Ağa tâbi‘-i sadrâzam, Tiryâkî Ahmed Çelebi b. el-Hâc Mansur, es-Seyyid Hasan b. Abdurrahim, es-Seyyid Molla Hüseyin b. Abdullah, es-Seyyid Süleyman Çelebi b. Abdi Beşe, Mahmud b. Abdurrahman, es-Seyyid Abdullah Çavuş el-Mübâşir ve gayruhum mine’l-huzzâr.