Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 422 Hüküm no: 475 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere Kadısı Mehmed Efendi b. Mustafa’dan kızları Safiye ve Fâtıma’ya intikal eden mallarından ihtiyaçları için nafaka takdir edildiği Mahmiye-i İstanbul’da Yenibahçe kurbünde Karabaş Mahallesi ahâlîsinden olup bundan akdem Medîne-i münevvere sallallâhu te‘âlâ alâ-münevvirihâ kādısı iken bundan esbak vefât eden Mehmed Efendi b. Mustafa’nın sulbiye sagīre kızları Safiye ve Fâtıma’nın vâlideleri ve kıbel-i şer‘den mansûbe vasiyyeleri olan işbu râfi‘atü’l-vesîka Şahbaz bt. Abdullah nâm hatun meclis-i şer‘-i şerîf-i enver ve mahfil-i dîn-i münîf-i ezherde takrîr-i kelâm ve tâʻbir ani’l-merâm edip vasiyyeleri olduğum sagīretân-ı mezkûretânın babaları müteveffâ-i mezbûrdan müntakil mâllarından kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i hâsim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīretân-ı mezkûretânın nafaka ve kisve-bahâları ve bi’l-cümle levâzım-ı zarûriyyeleri için babaları müteveffâ-i mezkûrdan müntakil mâllarından târih-i kitâbdan her biri için yevmî yirmişer akçeden cem‘an kırk akçe farz ve takdîr edip meblağ-ı mefrûz-ı mezkûru sagīretân-ı mezkûretânın nafaka ve kisve ve sâir levâzım-ı zarûriyyelerine harc u sarfa ve lede’l-iktizâ istidâneye ve inde’z-zafer sagīretân-ı mezkûretân üzerine rücû‘a mezkûre Şahbaz Hatun’a taraf-ı şer‘den izin verilmeğin mâ-hüve’l-vâki‘ bi’t-taleb ketb olundu. Fî 29 min-Cumâdelâhire sene 1121 Şuhûdü’l-hâl: Kethüdâ Mustafa Efendi, Çukadâr el-Hâc Hüseyin b. Abdullah, el-Hâc Hasan Sarrac, Mustafa Çelebi b. Şa‘ban ve gayruhum mine’l-huzzâr.