Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 423 Hüküm no: 476 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bender-i Reşid’de ikamet eden Hacı Ali b. Hacı Mustafa b. Abdullah’ın Harâccı Kara Mehmed mahallesindeki evinin Mehmed Ağa b. Abdurrahman’a satıldığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ es-Seyyid Mustafa Efendi b. Abdülkerim ta‘yîn ve irsâl olunup ol dahi mahmiye-i İstanbul’da Rüstempaşa Câmi‘-i şerîfi kurbünde Çukurhan demekle ma‘rûf handa vâki‘ el-Hâc Abdülhay b. Mehmed’in sâkin olduğu odaya varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî eyledikde Bender-i Reşid’de sâkin Bakaradalı el-Hâc Ali b. el-Hâc Mustafa b. Abdullah tarafından menzil-i âti’l-beyânı bedel-i misli ile âhara ferağ ve kabz-ı bedel ve bedelini kendiye îsâle vekîl olduğu Mehter Ahmed Ağa b. Mehmed ve el-Hâc Mehmed b. Hasan ve Ahmed Çelebi b. Mehmed ve el-Hâc İsmail b. el-Hâc İbrahim nâm kimesneler şehâdetleriyle mahzar-ı münkir-i hasm-ı câhid-i şer‘îde şer‘an sâbit olan mezbûr el-Hâc Abdülhay meclis-i ma‘kūd-ı mezkûrda işbu bâ‘isü’l-kitâb fahrü’l-akrân Mehmed Ağa b. Abdurrahman mahzarında bi’l-vekâle ikrâr ve takrîr-i kelâm edip mahmiye-i mezbûrede Unkapanı dâhilinde Harâccı Kara Mehmed Mahallesiʼnde vâki‘ merhûm Defterdâr Seyfullah Efendi ve Mismârî Şücâ‘ vakıflarından bâ-icâreteyni’l-ma‘lûmeteyn [65b] müvekkilimin taht-ı tasarrufunda olup bir tarafdan yine Mismârî Şücâ‘ Vakfı’ndan olan uncu mahzeni ve bir tarafdan Kethüdâ İbrahim Ağa menzili ve iki tarafdan tarîk-i âm ile mahdûd dâhilen tabaka-i ulyâda iki bâb oda ve bir kebîr sofa ve bir abdesthâne ve tabaka-i vustâda iki bâb oda ve bir sofa ve bir kenîf ve tabaka-i süflâda bir bâb na‘lband dükkânı ve bir ahır ve bir sagīr oda ve bir abdesthâne ve bir kenîf ve bir hamam ve bir câmekân ve bir kârgîr mahzen ve bir kârgîr matbah ve bir bi’r-i mâ-i lezîz ve bir mikdâr havlu ve hâriciyede fevkānî bir bâb oda ve bir sofa ve tahtında bir ahır ve bir kenîf ve bir abdesthâneyi müştemil menzili bâ-izn-i mütevellî vekâletim hasebiyle mezbûr Mehmed Ağa’ya bin dört yüz guruş bedel mukābelesinde ferağ-ı mu‘teber-i kat‘î ile ferağ ve tefvîz eylediğimde ol dahi ber-vech-i muharrer tefevvüz ve kabûl eylediğinden sonra bedeli olan meblağ-ı mezbûr bin dört yüz guruşu bi’l-vekâle mezbûr Mehmed Ağa yedinden tamamen ahz u kabz eyledim baʻde’l-yevm menzil-i mevkūf-ı mezkûr merkūm Mehmed Ağa’nın dâhil-i havza-i tasarrufu olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’l-mer‘î mezbûr Mehmed Ağa meclis-i mezkûrda vekîl-i merkūm el-Hâc Abdülhay muvâcehesinde ikrâr ve takrîr-i kelâm edip menzil-i mahdûd-ı mezkûrun istîfâsında ve bedel-i mezkûra müte‘allika âmme-i de‘âvî ve mutâlebât ve eymân ve muhâsamâtdan müvekkil-i merkūmun ve vekîl-i mezkûrun zimmetlerini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Hasan b. Abdullah ve Muhzır el-Hâc Ahmed b. Ali ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 14 min-Recebi’l-ferd sene 1121 Şuhûdü’l-hâl: el-Hâc Ahmed Ağa b. Mehmed, Mehmed Çelebi b. el-Hâc Mustafa, Mustafa Çelebi b. Hasan, Ahmed Efendi b. Mehmed, Mehmed Hoca b. Muharrem, Hüseyin Çelebi b. Mustafa, Hasan Çelebi b. el-Hâc Sinan, Süleyman Çelebi b. Abdullah, Seydî Ali b. Abdullah ve gayruhum mine’l-huzzâr.