Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 425 Hüküm no: 479 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bosna kadısı Ahmed Efendi b. Mustafa’nın Keçeci Pîrî mahallesindeki evini borcuna mahsuben hanımı Emetullah bt. Abdullah’a sattığı Sâbıkā Bosna kādısı olan umdetü’l-mevâli’l-izâm ve’l-e‘âli’l-fihâm Ahmed Efendi b. Mustafa meclis-i şer‘-i hatîr-i lâzımü’t-tevkīrde hâlâ zevce-i mükerremeleri işbu râfi‘atü’l-kitâb Emetullah bt. Abdurrahman nâm hatun tarafından husûs-ı âti’z-zikri tasdîka vekîl olduğu Derviş Çelebi b. Selim ve Abdullah b. Abdurrahman şehâdetleriyle sâbit olan Hasan Efendi b. Abdullah mahzarında ikrâr ve takrîr-i kelâm edip mahmiye-i İstanbul’da Keçeci Pîrî Mahallesiʼnde vâki‘ bir tarafdan Mustafa Beşe mülkü ve bir tarafdan Hüseyin Efendi vakfı olan menzil ve bir tarafdan bakkal dükkânı ve bir tarafdan tarîk-i âm ile mahdûd fevkānî bir bâb oda ve bir matbah ve tahtânî bir bâb oda ve bir mikdâr havluyu müştemil mülk menzilimi zevcem mezbûre Emetullah’a tarafeynden îcâb ve kabûlü hâvî bey‘-i kat‘î ile yüz guruşa bey‘ ve teslîm ol dahi iştirâ ve tesellüm ettiğinden sonra semeni olan meblağ-ı mezbûru zevcem mezbûreye deynim olan yüz guruşa takās ol dahi mukāssa ve kabûl eyledi baʻde’l-yevm menzil-i mezbûr-ı mezkûre Emetullah’ın mülk-i müşterâsıdır keyfe mâ teşâ mutasarrıfe olsun dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 10 min-Recebi’l-mürecceb sene 1121 Şuhûdü’l-hâl: Hüseyin Efendi b. Hasan el-Kādı, Fahrü’l-müderrisîni’l-kirâm es-Seyyid İbrahim Efendi b. Murad, Ahmed Çelebi b. Hanefî, Abdullah b. Mustafa, Abdullah b. Abdullah ve gayruhum mine’l-huzzâr.