Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 427 Hüküm no: 481 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Hacı Mehmed’in Hadice bt. Abdullah’daki emanet parasından kalan parayı sulh yoluyla teslim aldığı Mahmiye-i İstanbul’da Ali Paşa-yı Atîk Mahallesi sükkânından İsmail b. el-Hâc Mehmed nâm kimesne meclis-i şer‘-i şerîf-i enverde hâfızatü hâze’l-kitâb Hadice bt. Abdullah nâm hatun ikrâr-ı tâm ve takrîr-i kelâm edip mahmiye-i mezbûrede vâki‘ Gümrük mukāta‘ası mâlından almak üzere berât-ı pâdişâhî ile mutasarrıf olduğum yevmî dört akçe vazîfemi bundan akdem ben diyâr-ı âhara âzim olduğumda işbu mezbûre Hadice’yi mârru’z--zikr vazîfemi ahz u kabza ve bana îsâle vekîl edip mezbûre Hadice dahi ber-vech-i muharrer yirmi aylık vazîfemden müctemi‘ yirmi guruş ahz u kabz edip kendi mesârifine sarfla istihlâk etmekle meblağ-ı mezbûrdan on bir guruşunu bana def‘ ü teslîm ben dahi yedinden ahz u kabz edip bâkī zimmetinde dokuz guruş hakkım kalmağla meblağ-ı bâkī-i mezbûru mezbûre Hadice’den taleb ve da‘vâ sadedinde olmuşidim el-hâletü hâzihî baʻde’l-münâza‘a beynimize muslihûn tavassut edip da‘vâ-yı mezkûremden beni mezbûre Hadice ile üç guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç guruşu mezbûre Hadice yedinden ahz u kabz edip bâkīsi altı guruş mutâlebesinden mezbûre Hadice’nin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Recebi’l-ferd sene 1121 Şuhûdü’l-hâl: Mustafa Çelebi b. Şa‘ban, Ömer Çelebi b. Ahmed, Monla Hasan b. Mustafa ve gayruhum mine’l-huzzâr.