Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 427 Hüküm no: 482 Orijinal metin no: [66a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Ali’nin geçinemediği kocası Hacı Süleyman b. Mustafa b. Ahmed’den boşandığı Mahmiye-i İstanbul’da Nişancı Paşa Mahallesiʼnde sâkine olup zâtı Mustafa Çelebi b. Osman ve Hüseyin Beşe b. Abdullah nâm kimesneler ta‘rîfleriyle mu‘arrefe olan Zeyneb bt. Ali nâm hatun mahfil-i kazâda zevc-i dâhili işbu râfi‘u’l-kitâb el-Hâc Süleyman b. Mustafa b. Ahmed tarafından husûs-ı âti’z-zikri tasdîka vekîl olduğu mu‘arrifân-ı mezbûrân Mustafa Çelebi ve Hüseyin Beşe şehâdetleriyle şer‘an sâbit olan Mehmed Beşe b. İbrahim nâm kimesne mahzarında ikrâr ve takrîr-i kelâm edip zevcim mezbûr el-Hâc Süleyman ile [66b] beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere vekîl-i mezbûr Mehmed Beşe ile muhâla‘a-i sahîha-i şer‘iyye ile hul‘ olup vekîl-i mezbûr dahi ber-vech-i meşrûh hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan ben zevcim mezbûr el-Hâc Süleyman’ın zimmetini ibrâ-i âmm-ı kātı‘u’n-nizâ‘la ibrâ ve iskāt edip vekîl-i mezbûr dahi kezâlik hukūk-ı zevciyete müte‘allika benim zimmetimi ibrâ-i âmm-ı kātı‘u’n-nizâ‘la ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Recebi’l-ferd sene 1121 Şuhûdü’l-hâl: Ömer Çelebi b. Ahmed, Mustafa Çelebi b. Şa‘ban, Ahmed Efendi b. Osman, Mehmed Efendi b. Hüseyin, Ali Çelebi b. Bâli, Ali Çelebi b. İvaz, Süleyman b. Abdullah, Çalık Mehmed, Osman Çelebi b. Hasan, Abdullah Çelebi b. Abdullah ve gayruhum mine’l-huzzâr.