Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 428 Hüküm no: 483 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbâki Çelebi b. Abdullah’ın boşandığı hanımı Fâtıma bt. Ahmed’in yanında olan oğlu Mehmed’in yedi yaşına geldiğinden babasına teslim edilmesi Mahmiye-i İstanbul’da Çakır Ağa Mahallesiʼnde sâkin işbu râfi‘u’l-kitâb Abdülbâki Çelebi b. Abdullah nâm kimesne meclis-i şer‘-i şerîf-i enverde zevce-i sâbıkāsı Fâtıma bt. Ahmed nâm hatun mahzarında üzerine da‘vâ ve takrîr-i kelâm edip bin yüz on dört senesi Recebi’l-mürecceb’inin onuncu günü zevciyyet beynimizde kāime iken benim firâşımdan hâsıl ve mezbûr[e]den mütevellid olan işbu sulbî oğlum Mehmed bu ana değin vâlidesi mezbûrenin hıdânesinde olup lâkin sinni yedi seneye bâliğ ve kendiye dahi istiğnâ hâsıl olup vâlidesi mezbûrenin hıdânesi sâkıta olmağın suâl olunup bana teslîme tenbîh olunmak matlûbumdur dedikde gıbbe’s-suâl mezbûre Fâtıma cevâbında hâl bâlâda takrîr olunduğu üzere olduğunu ikrâr ve sagīr-i mezbûrun sinni yedi seneye bâliğ olup ber-vech-i muharrer rüşdü olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Derviş Ali Mahallesiʼnde sâkin Mahmud b. Mustafa ve Neslişah Mahallesiʼnde sâkin Ali b. Hüseyin nâm kimesneler li-ecli’ş-şehâde meclis-i şer‘a hâzırân olup istişhâd <> olundukda işbu müdde‘î-i mezbûr Abdülbâki Çelebi ile zevce-i sâbıkāsı merkūme Fâtıma’nın beynlerinde zevciyyet kāime iken mezbûr Abdülbâki Çelebi’nin firâşından hâsıl ve zevcesi mezbûre Fâtıma’dan bin yüz on dört senesi Recebi’l-mürecceb’inin onuncu günü tevellüd edip sagīr-i mezbûr Mehmed’e istiğnâ dahi hâsıl olup vâlidesi mezbûrenin hakk-ı hıdânesi sâkıta olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince sagīr-i mezbûr Mehmed’i babası merkūm Abdülbâki Çelebi’ye teslîme mezbûre Fâtıma’ya tenbîh-birle mâ-vaka‘a bi’t-taleb ketb olundu. Fî 15 min-Recebi’l-ferd sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Ali Çelebi b. Bali, Abdullah b. Abdullah ve gayruhum mine’l-huzzâr.