Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 429 Hüküm no: 484 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Yusuf’un Sinan Paşa mahallesindeki evinin bir bölümünü azatlı cariyesi Nazikî bt. Abdullah b. Abdurrahman’a satıp zimmetini ibra ettiği Mahmiye-i İstanbul’da Sinan Paşa Mahallesiʼnde sâkin İbrahim Ağa b. Yusuf nâm kimesne meclis-i şer‘-i şerîf-i enverde kendi atîkalarından işbu râfi‘atü’l-vesîka Nazikî bt. Abdullah b. Abdurrahman tarafından husûs-ı âti’z-zikri tasdîka vekîli olan Müezzin Hasan Efendi b. Süleyman nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan mescid-i şerîf haremi ve bir tarafdan Taşçı Ali menzili ve bir tarafdan Emine Hatun menzili ve bir tarafdan tarîk-i hâs ile mahdûd dâhiliyesinde fevkānî üç bâb oda ve bir sofa ve tahtânî bir matbah ve bir kiler ve bir mikdâr havlu ve hâriciyesinde fevkānî bir bâb oda ve bir sofa ve tahtânî bir matbah ve bir kiler ve bir kenîf ve bir mikdâr havluyu müştemil mülk menzilin mârru’z--zikr hâriciyesini cemî‘ tevâbi‘ ve levâhıkıyla tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile müvekkile-i mezbûre Nazikî’ye iki yüz elli guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr mutâlebesinden müvekkile-i mezbûrenin zimmetini ibrâ-i âm ile ibrâ ve iskāt [eyledim] baʻde’l-yevm hâriciye-i mezkûre müvekkile-i mezbûrenin mülk-i müşterâsı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-Recebi’l-ferd sene 1121 Şuhûdü’l-hâl: Mustafa Çelebi b. Şa‘ban, Ömer Çelebi b. Ahmed, Hasan Çelebi b. Mustafa, Ahmed b. Osman, Ali b. İvaz, Mehmed b. Ahmed ve gayruhum mine’l-huzzâr.