Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 430 Hüküm no: 485 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Hasan’ın geçinemediği kocası Hasan b. Abdullah’dan boşandığı Mahmiye-i İstanbul’da Muhtesib İskender Mahallesiʼnde sâkine olup zâtı ta‘rîf-i şer‘î ile mu‘arrefe olan Zeyneb bt. Hasan nâm hatun meclis-i şer‘-i şerîf-i enverde zevc-i dâhili işbu sâhibü’l-kitâb Hasan b. Abdullah nâm kimesne mahzarında ikrâr ve takrîr-i kelâm edip mezbûr Hasan zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan üç bin altı yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Hasan ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan mezbûr Hasan’ın zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 15 min-Recebi’l-ferd sene 1121 Şuhûdü’l-hâl: Mehmed b. Hüseyin, diğer Mehmed b. Ahmed Muhzır, Receb b. İvaz, Mustafa Çelebi b. Şa‘ban ve gayruhum mine’l-huzzâr.