Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 434 Hüküm no: 488 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri v. Panayot’un Petro v. Todori’de olan alacağını sulh yoluyla tahsil edip zimmetini ibra ettiği Bakkāl tâifesinden Dimitri v. Panayot nâm zimmî mahfil-i kazâda yine tâife-i mezbûreden Petro v. Todori nâm zimmî muvâcehesinde ikrâr ve takrîr-i kelâm edip târih-i rakīmden bir sene mukaddem mezbûr Petro’nun destgâhdârı olup bana medfû‘u olan sermâyeden ziyâde on iki bin akçe dahi kendi mâlımdan mezbûr Petro’ya vermişidim deyü da‘vâ eylediğimde ol dahi inkâr etmeğin beynimizde münâza‘ât-ı kesîre ve muhâsamât-ı ekîde cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni mezbûr Petro ile an-inkârin iki bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki bin akçeyi mezbûr Petro yedinden tamamen ahz u kabz edip husûs-ı mezkûra müte‘allika âmme-i da‘vâdan mezbûr Petro’nun zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Recebi’l-ferd sene 1121 Şuhûdü’l-hâl: Hüseyin Bölükbaşı b. Receb, Şa‘ban Bölükbaşı b. Mehmed, İsmail Yazıcı b. Mustafa, Pazarbaşı el-Hâc Hüseyin b. Hasan ve gayruhum mine’l-huzzâr. Anderetso v. Dimo, Panayot v. Dimo, Yani v. Yorgi, Yorgi v. Yani.