Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 436 Hüküm no: 491 Orijinal metin no: [67b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Hidayetullah ile kız kardeşinin Mustafa Paşa mahallesindeki evlerini Hasan b. Musa ile hanımı Fâtıma bt. Abdülkadir’e sattıkları Mahmiye-i İstanbul’da Seferikoz Mahallesi sükkânından kendi asıl ve li-ebeveyn kız karındaşı tarafından husûs-ı âti’l-beyânı ikrâra vekîl olduğu Mehmed Çelebi b. Hidayetullah ve diğer Mehmed Çelebi b. Receb şehâdetleriyle şer‘an sâbit olan Mehmed Çelebi b. Mustafa nâm kimesne meclis-i şer‘-i şerîf-i enverde yine kendi asıl ve zevcesi Fâtıma bt. Abdulkādir tarafından husûs-ı âti’l-beyânı tasdîka vekîl olduğu mu‘arrifân-ı mezkûrân şehâdetleriyle şer‘an sâbit olan işbu râfi‘u’l-vesîka Hasan b. Musa nâm kimesne muvâcehesinde bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezkûre ile benim silk-i mülk-i sahîhimizde münselik olup mahmiye-i mezkûrede Mustafa Paşa Mahallesiʼnde vâki‘ [68a] bir tarafdan Sırabıçak menzili ve bir tarafdan Âişe Hatun menzili ve iki tarafdan tarîk-i âm ile mahdûd fevkānî bir oda ve tahtânî bir oda ve bir sofa ve dehlîz ve bi’r-i mâ ve bir çeşme ve etrâf-ı selâsesi taş duvarı müştemil mülk menzilimizi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz kırk guruşa mezkûrân Hasan ve zevcesi Fâtıma’ya ale’l-iştirâki’s-seviyy bey‘ ve temlîk ve teslîm onlar dahi ber-vech-i meşrûh iştirâk-i seviyy üzere iştirâ ve temellük ve tesellüm ve kabûl eylediklerinden sonra semeni olan meblağ-ı mezkûr yüz kırk guruşu mezkûrân Hasan ve zevcesi Fâtıma yedlerinden bi’t-tamam ve’l-kemâl ahz u kabz ve beynimizde alâ-kadri’l-hısas iktisâm eyledik baʻde’l-yevm menzil-i mahdûd-ı mezkûr mezbûrân Hasan ve zevcesi Fâtıma’nın iştirâk-i seviyy üzere mülk ve hakları olmuşdur keyfe mâ yeşâ ve yehtâr mutasarrıflar olsunlar dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 24 min-Recebi’l-mürecceb sene 1121 Şuhûdü’l-hâl: Halil Çelebi b. İbrahim, İbrahim Çelebi b. Musa, el-Hâc Halil b. İbrahim, el-Hâc Ahmed b. Ahmed, Mustafa Çelebi b. Ahmed, Mehmed Çelebi b. Receb, Ali Çelebi b. İvaz, Mehmed Çelebi b. Ahmed, Mustafa Çelebi b. Şa‘ban, Osman Çelebi b. Hasan ve gayruhum mine’l-huzzâr.