Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 436 Hüküm no: 492 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe ve Fâtıma kardeşlerin babalarından intikal eden paralarını vasileri olan amcaları Ali Çelebi b. Hasan’dan teslim aldıkları Mahmiye-i İstanbul’da Keçeci Pîrî Mahallesi sâkinelerinden Âişe ve Fâtıma ibnetey Mehmed nâm hatun taraflarından husûs-ı âti’z-zikri ikrâra vekîl olduğu mezbûretânın zâtlarını ma‘rifet-i şer‘iyye ile ârifân İbrahim Çelebi b. el-Hâc Mustafa ve Halil Bey b. İbrahim nâm kimesneler şehâdetleriyle şer‘an sâbit olan el-Hâc Mustafa b. Ömer nâm kimesne meclis-i şer‘-i şerîf-i enverde mezbûretânın li-ebeveyn ammileri ve hâl-i sıgārlarında vasiyy-i muhtârları olmağla babalarından müntakil mâllarına ber-mûceb-i defter-i kassâm vâzı‘u’l-yed olan işbu râfi‘u’l-kitâb Ali Çelebi b. Hasan nâm kimesne mahzarında bi’l-vekâle ikrâr ve takrîr-i kelâm edip mezbûr Ali Çelebi müvekkilelerim mezbûretânın hâl-i sıgārlarında vasiyy-i muhtârları olup ber-mûceb-i defter-i kassâm babalarının terekesini kabz ve i‘mâl ve hâsıl olan ribhinden yevmî birer para nafaka-i mefrûzaları için altı senede doksan dokuz guruş ve bir sülüs guruş harc u sarf ve bâkī asl-ı terekeden olan meblağ-ı mezbûru bundan akdem müvekkilelerime def‘ ü teslîm onlar dahi ber-mûceb-i defter-i mezkûr yedinden ahz u kabz edip baʻde’l-yevm ammileri mezkûr ile babaları mezbûrun kalîl ü kesîr ve celîl ü hakīr terekesine müte‘allika da‘vâ ve nizâ‘ları kalmayıp ammileri mezkûr Ali’nin husûs-ı mezbûra müte‘allika âmme-i da‘vâdan zimmetini ibrâ-i âmm-ı kātı‘u’n-nizâ‘la ibrâ ve iskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Recebi’l-ferd sene 1121 Şuhûdü’l-hâl: Fahrü’l-müderrisîni’l-kirâm Ahmed Efendi, Halil Çelebi b. İbrahim, Derviş Çelebi b. Selim, Mehmed Çelebi b. el-Hâc İbrahim, Nasuh Çelebi Sarrac, Abdullah Çelebi b. el-Hâc Mehmed, Halil Çelebi Suyolcu, Halil Çelebi b. Mehmed, Mustafa Çelebi Habbâz ve gayruhum mine’l-huzzâr.