Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 437 Hüküm no: 493 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Bayezid’in alacak iddiasıyla Hacı Mehmed b. Mehmed’e açtığı davada haksız bulunarak davanın reddedildiği Mahmiye-i İstanbul’da Mesîh Paşa-yı Atîk Mahallesi sükkânından Mehmed Çelebi b. Bayezid nâm kimesne meclis-i şer‘-i şerîf-i lâzımü’t-tevkīrde bâ‘isü hâze’l-kitâb el-Hâc Mehmed b. Mehmed nâm kimesne mahzarında üzerine da‘vâ ve takrîr-i kelâm edip mezbûr el-Hâc Mehmed’in gāibân ani’l-meclis Abdullah Bey ve Ahmed Efendi nâm kimesneler zimmetlerinde iki kıt‘a temessük mantûkunca elli altı guruş hakkı olup meblağ-ı mezbûr elli altı guruşu ben gāibân-ı mezbûrânın gıyâblarında mezbûr el-Hâc Mehmed’e bilâ-emr edâ edip ba‘dehû mezbûrândan alâ-tarîkı’l-mürâca‘a da‘vâ eylediğimde meblağ-ı mezbûru bizim emrimiz yoğiken fuzûlî edâ etmişsin deyü bana edâ ve teslîm etmemeleriyle hâlâ merkūm el-Hâc Mehmed’den istirdâd ederim suâl olunsun dedikde müdde‘î-i mezbûrun takrîr-i meşrûhu üzere da‘vâsı meşrû‘a olmayıp merkūm el-Hâc Mehmed’e suâl dahi tevcîh etmemeğin müdde‘î-i mezbûr Mehmed Çelebi bî-vech mu‘ârazadan men‘-birle mâ-vaka‘a bi’t-taleb ketb olundu. Fî 25 min-Recebi’l-ferd sene 1121 Şuhûdü’l-hâl: Yahya Bey b. İbrahim el-Mübâşir, Mustafa Çelebi b. Abdullah, Mustafa Çelebi b. Şa‘ban, Ali Çelebi b. Bâli ve gayruhum mine’l-huzzâr.