Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 438 Hüküm no: 494 Orijinal metin no: [68a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Receb’in Yalakabâd kazasının Tahtânî Kocaderesi köyündeki evini müştemilâtıyla birlikte hanımı Ayşe bt. Mehmed’e sattığı Vilâyet-i Anadolu’da Yalakābâd kazâsına tâbi‘ Tahtânî Kocaderesi nâm karye ahâlîsinden olup mahmiye-i İstanbul’da Koska fırını kurbünde müsâfiren sâkin Mustafa Beşe b. Receb nâm kimesne mahfil-i kazâda hâlâ zevcesi işbu râfi‘atü’l-kitâb Âişe bt. Mehmed nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup karye-i mezbûrede vâki‘ bir tarafdan karye-i mezbûre imâmına meşrûta vakıf menzil ve iki tarafdan Kalkancıoğlu Mehmed mülkü ve bir tarafdan tarîk-i âm ile mahdûd bir bâb fevkānî oda ve bir sofa ve ahır ve bahçe ve havluyu müştemil mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile zevcem mezbûre Âişe’ye yüz elli guruşa bey‘ ve temlîk eylediğimde ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr yüz elli guruşu mezbûre Âişe yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtıyla mezbûre Ayşe’nin mülk-i müşterâsı ve hakkı sırfı olup mahallinde zabt u tasarrufa mezbûreyi taslît eyledim keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Recebi’l-ferd sene 1121 Şuhûdü’l-hâl: İvaz Ağa b. Ahmed, Kahramanoğlu Mehmed b. Abdi, Kasab Kara Mehmed b. Ali, Kel Mehmed b. Mustafa, Deli Bayram b. İbrahim, İbrahim b. Hüseyin, Mustafa b. Şa‘ban, Ali b. Bâli, Hasan b. Mustafa, Ali b. İvaz ve gayruhum mine’l-huzzâr.