Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 444 Hüküm no: 501 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tellak Bostancı Mehmed Beşe b. Abdullah’ın yanında çalıştığı hamamcı İsmail Ağa b. Mehmed’e alacak iddiasıyla açtığı davayı ispat edemediği Mahmiye-i İstanbul’da Aksaray’da vâki‘ hamamda dellâk olan Bostancı Mehmed Beşe b. Abdullah nâm kimesne mahfil-i kazâda hamamcısı işbu râfi‘u’l-vesîka İsmail Ağa b. Mehmed nâm kimesne mahzarında üzerine da‘vâ ve takrîr-i kelâm edip mezbûr İsmail Ağa bundan akdem benim otuz guruşumu bi-gayr-ı hakkın ahz u kabz etmekle suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûrun bi-gayr-ı hakkın otuz guruşunu ahz u kabz etmeyip el-ân üzerine redd ü damândan nesne lâzım olmadığına mezbûr İsmail Ağa’ya yemîn teklîf olundukda [69b] ol dahi alâ-vefkı’l-mesûl yemîn biʼllâhi te‘âlâ etmeğin mûcebince müdde‘î-i mesfûr bilâ-beyyine bî-vech mu‘ârazadan men‘-birle mâ-vaka‘a bi’t-taleb ketb olundu. Fî 17 min-Recebi’l-mürecceb sene 1121 Şuhûdü’l-hâl: el-Hâc Mustafa Ağa b. Mehmed, el-Hâc Süleyman Ağa b. Mustafa, Ahmed Çelebi b. Hüseyin, el-Hâc Halil b. Mustafa, el-Hâc Ali, Ali b. İvaz, Nuh b. Mustafa, Ali Çavuş el-Mübâşir ve gayruhum mine’l-huzzâr.