Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 444 Hüküm no: 502 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Yakob’un bazı eşyalarıyla evinin yarısını kızı Gonçe bt. Sanan’a sattığı Mahmiye-i İstanbul’da el-Hâc İsa Mahallesiʼnde sâkine Maryem bt. Yakob nâm Nasrâniye meclis-i şer‘-i hatîr-i lâzımü’t-tevkīrde sadriye kızı Gonçe bt. Mıgırdıç nâm Nasrâniyenin zevci ve tarafından husûs-ı âti’z-zikri tasdîka vekîl olduğu nehc-i şer‘î üzere sâbit olan İstosder v. Avadik nâm zimmî muvâcehesinde ikrâr ve takrîr-i kelâm edip eşyâ-i memlûkemden üç döşek ve altı yorgan ve beş minder ve bir kebe ve sagīr on aded minder ve on yasdık ve bir ihrâm ve elli dört vakıyye bakır evânî ile mahmiye-i mezbûrede Kâtib Kasım Mahallesiʼnde vâki‘ bir tarafdan Gonçe bt. Sanan nâm Nasrâniye mülkü ve bir tarafdan Şaşı nâm zimmî mülkü ve iki tarafdan tarîk-i âm ile mahdûd bir bâb fevkānî oda ve bi’r-i mâ ve bahçe ve kenîfi müştemil mülk menzilde olan nısf hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin kızım müvekkile-i mezbûreye dört yüz guruşa bey‘ ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr dört yüz guruş mutâlebesinden kızım müvekkile Gonçe’nin zimmetini ibrâ ve iskāt eyledim baʻde’l-yevm ibrâ ve iskāt eyledim baʻde’l-yevm eşyâ-i muharrere-i mezbûre ve nısf menzil-i mezbûr kızım müvekkile-i merkūmenin mülk-i müşterâsı olup benim alâka ve medhalim kalmamışdır keyfe mâ teşâ ve tehtâr mutasarrıfe olsun dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 27 min-Cumâdelâhire sene 1121 Şuhûdü’l-hâl: el-Hâc Hüseyin b. Hasan, el-Hâc Ahmed b. Hüseyin, es-Seyyid Osman Çelebi b. es-Seyyid Mustafa, Na‘lıncı Hasan Çelebi b. ( ) Efendi, Mehmed Çelebi b. Mehmed ve gayruhum mine’l-huzzâr.