Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 445 Hüküm no: 504 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Yakob’un bazı eşyaları ile bir dükkanını kızı Derihi? bt. Mıgırdıç’a bedelsiz olarak verdiği Mahmiye-i İstanbul’da el-Hâc İsa Mahallesiʼnde sâkine Maryem bt. Yakob nâm Nasrâniye meclis-i şer‘-i şerîf-i enverde sadriye kızı Derihi bt. Mıgırdıç nâm Nasrâniyenin zevci ve husûs-ı âti’z-zikri tasdîka tarafından vekîli olduğu nehc-i şer‘î üzere sâbit olan Mikail v. Panos nâm zimmî muvâcehesinde ikrâr ve takrîr-i kelâm edip eşyâ-i memlûkemden iki döşek ve yedi yorgan ve beş minder ve bir kebe ve on sagīr minder ve on yasdık ve bir ihrâm ve elli dört vakıyye bakır evânî ve üçer ayak bir çift zümrüd küpemi kızım müvekkile-i mezbûre Derihi’ye bi-safkatin vâhidetin dört yüz guruşa bey‘ ve temlîk ve teslîm ve Molla Aşkī Vakfı’ndan olup mahmiye-i mezbûrede Sarrachâne başında vâki‘ ma‘lûmü’l-hudûd bi’l-icâreteyn taht-ı tasarrufumda olan dükkânı dahi bâ-ma‘rifet-i mütevellî meccânen ferağ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eylediğinden sonra semen-i mezbûr dört yüz guruş mutâlebesinden müvekkile-i mezbûrenin zimmetini ibrâ ve iskāt eyledim baʻde’l-yevm eşyâ-i muharrere-i mezbûre mülk-i müşterâsı ve dükkân-ı merkūm hakk-ı müfevvazı olup benim kat‘â alâka ve medhalim kalmamışdır dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 27 min-Cumâdelâhire sene 1121 Şuhûdü’l-hâl: el-Hâc Hüseyin b. Hasan, el-Hâc Ahmed b. el-Hâc Hüseyin, es-Seyyid Osman Çelebi b. es-Seyyid Mustafa, Mustafa Çelebi b. Şa‘ban, Na‘lıncı Hasan Çelebi b. ( ), Mehmed Çelebi b. Mehmed Efendi ve gayruhum mine’l-huzzâr.