Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 446 Hüküm no: 505 Orijinal metin no: [69b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Hüseyin b. Hasan’ın vasiyeti Husûs-ı âti’z-zikrin mahallinde ketb ü tahrîri için savb-ı şer‘-i şerîf-i enverden Mevlânâ Ali Efendi b. Mustafa irsâl olunup ol dahi mahmiye-i İstanbul’da Derviş Ali Mahallesiʼnde sâkin Mehmed Bey b. Hüseyin b. Hasan nâm kimesnenin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mezbûr Mehmed Bey meclis-i ma‘kūd-ı mezbûrda işbu râfi‘u’l-kitâb Mustafa Çelebi b. Mehmed mahzarında takrîr-i kelâm ve tâʻbir ani’l-merâm edip ben bi-emri’llâhi te‘âlâ fevt olduğumda işbu sâkin olduğum menzil içinde mevcûde bir siyah aba yağmurluk ve bir yeşil çuka kaplı kuzu kürkü ve bir köhne dolama ve def‘a bir kırmızı dolama ve bir kırmızı çuka dolama ve bir kırmızı çuka çakşır ve bir kırmızı çuka kontuş ve bir köhne zıbın ve bir alaca anteri ve bir yeşil kavuk ve bir sarık ve iki don ve iki gömlek ve iki yasdık ve bir döşek ve bir köhne yorgan ve bir çârşeb ve bir köhne alaca kilim [70a] ve bir Türkmen keçesi ve iki Mısır hasırı ve bir leğen ve iki tas ve bir sagīr bakraç ve iki tuç sahan ve bir tencere ma‘a kapak ve bir kara kılıç ve bir fânûs ve sâir kalîl ü kesîr ism-i mâl ıtlâk olunur eşyâmı mezbûr Mustafa Çelebi ahz u kabz edip semen-i misli ile sûk-ı sultânîde bey‘u’l-bey‘ mecmû‘-ı semeninden kadr-i kifâye techîz ve tekfînim ve levâzım-ı defnim görülüp ve işbu zevcem Muazzeze bt. Abdullah nâm hatuna zimmetimde mütekarrer ve ma‘kūdün-aleyh <> dört bin akçe mehr-i müecceli ve cihet-i deyn-i şer‘îden beş bin akçe ki cem‘an mezbûre Muazzeze Hatun’a dokuz bin akçe deynim edâ olundukdan sonra fazla kalırsa vilâyet-i Rumeli’nde Baba-yı Atîk kazâsına tâbi‘ Korapa nâm karyede li-ebeveyn er karındaşım Ebûbekir nâm kimesneye îsâl oluna deyü vasiyet edip tenfîzine işbu Mustafa Çelebi’yi vasiyy-i muhtâr nasb ve ihtiyâr eylediğinde ol dahi vech-i meşrûh üzere vesâyet-i mezbûreyi kabûl ve merâsimini edâya ta‘ahhüd ve iltizâm eyledi dedikde vâki‘ hâli mevlânâ-yı mezbûr mahallinde tahrîr ba‘dehû Hasan b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 13 min-Recebi’l-ferd sene 1121 Şuhûdü’l-hâl: Ali Efendi b. el-Hâc Mehmed el-İmâm, Hüseyin b. Abdullah Muhzır, Mehmed Çelebi b. İbrahim, Mehmed Çavuş b. Hüseyin, Receb Çelebi b. İvaz, Ahmed Ağa b. Mustafa, Ali Çelebi b. Hüseyin, Mustafa Kādızâde, Ali b. Ahmed, Mehmed Çelebi b. Ali, İbrahim b. Ahmed ve gayruhum mine’l-huzzâr.