Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 447 Hüküm no: 506 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. İvaz’ın Ca‘fer Subaşı Mahallesi’ndeki bahçesini Ali b. Mahmud’a sattığı Mahmiye-i İstanbul’da Ca‘fer Subaşı Mahallesiʼnde sâkin Receb b. İvaz nâm kimesne meclis-i şer‘-i şerîf-i enverde işbu sâhibü’l-kitâb Ali b. Mahmud nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik emlâkimden olup mahalle-i mezbûrede vâki‘ bir tarafdan Fâtıma Hatun menzili ve bir tarafdan Gonca Hatun menzili ve iki tarafdan tarîk-i âm ile mahdûd ve mümtâz tûlen on bir zirâ‘ ve arzen on bir zirâ‘ bi-hesâb-ı terbî‘î yüz yirmi bir zirâ‘ eşcâr-ı müsmire ve gayr-ı müsmireyi müştemil mülk bahçemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile yetmiş guruşa mezbûr Ali’ye bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr yetmiş guruşu mezbûr Ali yedinden tamamen ahz u kabz eyledim fîmâ-ba‘d zikri mürûr eden bahçe cemî‘ müştemilâtıyla mezbûr Ali’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 20 min-Recebi’l-ferd sene 1121 Şuhûdü’l-hâl: Mehmed Beşe b. Himmet, Hüseyin Yazıcı b. Abdullah, Mehmed Çelebi b. Müstedâm, Ali Çelebi b. Hüseyin, Hasan Beşe b. Abdullah, Mustafa Çelebi b. Şa‘ban, Ali Çelebi b. İvaz, Süleyman b. Abdullah, Mehmed b. Ahmed, Ali Beşe b. Bâli, Ali Sofu b. Abdurrahman, Abdullah Çelebi b. Abdülkerim ve gayruhum mine’l-huzzâr.