Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 447 Hüküm no: 507 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdi’nin, kocası Hasan Beşe ile olan nikahlarının geçerli olmadığı yolundaki iddiasını ispat edemediği için kocasına muarazadan menolunduğu Mahmiye-i İstanbul’da Mesîh Paşa Mahallesiʼnde sâkine olup zâtı ta‘rîf-i şer‘î ile mu‘arrefe olan Emine bt. Abdi nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Hasan Beşe b. Süleyman nâm kimesne mahzarında takrîr-i da‘vâ edip mezbûr Hasan Beşe zevcim olup târih-i kitâbdan yedi sene mukaddem beni talâk-ı selâse ile tatlîk edip iddetim münkaziye oldukdan sonra ben işbu hâzır bi’l-meclis Hazar nâm kimesne[ye] nefsimi tezvîc edip mezbûr Hazar dahi kendi menzilime gelip iki saʻat mikdârı meks edip kable’d-duhûl beni tatlîk edip ben şerâ[i]t-i hılli âlime olmamağla şerâ[i]t-i hıll bulunmadın zevc-i evvelim mezbûr Hasan Beşe beni kable vücûdi şerâti’l-hıll tezevvüc etmişidi mezbûr Hasan Beşe’nin nikâhı sahîh olmamağla suâl olunup sebîlim tahliye ve zevciyyet mu‘âmelesiyle bana ta‘arruzdan men‘ olunmak murâdımdır dedikde gıbbe’s-suâl zevc-i sânî mezkûr Hazar(Hızır) müdde‘iye-i mezbûreye dâhil olup şerâ[i]t-i hâll [hıll] bulunmuş idi demekle zevc-i evvel mezkûr Hasan Beşe dahi mezkûr Hızır’ı cevâbında tasdîk edip ve kütüb-i fıkhiyye-i mu‘teberâtdan (Mütedâvelü’l-Kā‘ıdibiyye’de?) “El-mutallakatü selâsen ize‘[te]ddet sümme tezevvecet sümme tallakaha’z-zevcü’s-sânî va‘teddet zevceha’l-evvel sümme kālet inne’z-zevce’s-sânî lem yedhul lî, ecâbe in sebeka minhâ mâ yünâkızu hâze’l-kavle lâ-yusaddaku ve lâ yüsme‘u ve in lem yesbak minhâ mâ yünâkızu kavlehâ lem yedhul lî fe-innehâ yusaddaku fî-zâlike ma‘a yemînihâ” deyü musarrah olmağın müdde‘iye-i mezbûreye vech-i meşrûh üzere medhûlün-bihâ olmayıp şerâit-i hıll bulunmadığından mâ‘adâ lem yedhul lî kavlini münâkız kendiden bir kavl dahi sâdır olmadığına yemîn teklîf olundukda ol dahi hasbe’l-mesûl yem[î]nden nükûl etmekle tezvîri zâhir olmağın müdde‘iyye-i mezbûreyi bî-vech mu‘ârazadan men‘-birle mâ-vaka‘a bi’t-taleb ketb olundu. Fî 13 min-Recebi’l-ferd li-sene ihdâ ve işrîn ve miʼete ve elf. Şuhûdü’l-hâl: Mustafa Çelebi b. Şa‘ban, Çalık Mehmed Beşe b. Abdullah, Süleyman Çelebi b. Abdullah, Ali b. Abdullah, Ali Çelebi b. İvaz, Abdullah b. Abdullah ve gayruhum mine’l-huzzâr. Şuhûdü’l-hâl: Mustafa Çelebi b. Şa‘ban, Çalık Mehmed Beşe b. Abdullah, Süleyman Çelebi b. Abdullah, Ali b. Abdullah, Ali Çelebi b. İvaz, Abdullah b. Abdullah ve gayruhum mine’l-huzzâr.