Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 448 Hüküm no: 508 Orijinal metin no: [70a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahne bt. Hindi’nin kayığını kocası Alos? v. Vasil’in borcuna mahsuben Ahmed, Süleyman, İbrahim ve Hasan’a sattığı Mahmiye-i İstanbul’da Ali Paşa-yı Atîk Mahallesiʼnde sâkine olup zâtı ta‘rîf-i şer‘î ile mu‘arrefe olan Şahne bt. Hindi nâm nasr[â]niye mahfil-i kazâda işbu bâ‘isû’l-kitâb Ahmed b. Mehmed ve Süleyman b. Mehmed ve İbrahim [b.] Mustafa ve Hasan b. Abdurrahman nâm kimesneler mahzarlarında ikrâr ve takrîr-i kelâm edip yedimde mülk ve hakkım olup mahrûse-i Galata’ya tâbi‘ kasaba-i Kasım Paşa iskelesinde mevcûd taş kayığı tâʻbir olunur kayığımı cemî‘ levâzımı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûrûn Ahmed ve Süleyman ve İbrahim ve Hasan’a üç yüz elli yedi guruşa bey‘ ve temlîk ve teslîm onlar dahi ber-vech-i muharrer yedimden iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr üç yüz elli yedi guruşu zevcim işbu hâzır bi’l-meclis Alos? v. Vasil’in mezbûrûn Ahmed ve Süleyman ve İbrahim ve Hasan’a zimmetinde deyni olan üç yüz elli yedi guruşa [70b] takās onlar dahi minvâl-i muharrer üzere mukāssa ve kabûl eylediler baʻde’l-yevm zikri mürûr eden kayık mezbûrûnun iştirâken mülk-i müşterâlarıdır benim kat‘â alâka ve medhalim yokdur keyfe mâ yeşâ’ûn ve yehtârûn mutasarrıfûn olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Recebi’l-ferd li-sene 1121 Şuhûdü’l-hâl: Mustafa Çelebi b. Şa‘ban, Ali b. İvaz, Abdullah b. Abdullah, Ali Çelebi b. Bâli ve gayruhum mine’l-huzzâr.