Üsküdar Mahkemesi 17 Numaralı Sicil (H.956-963/ M.1549-1556) cilt: 6, sayfa: 90 Hüküm no: 84 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmil Fotinoz b. Yani’nin Tulayina’nın ekmediği bağ yerini Kosta b. Yani’ye tapuladığı Vech-i tahrîr-i sicil budur ki Karye-i Akkilise’ye âmil olan Fotinoz b. Yani meclis-i şer‘de ikrâr ve i‘tirâf edip karye-i mezbûrdan Tulayina nâm zimmîyye yedinde bir kıt‘a köhne bağ yerine keten ekip ba‘dehû beş yıl hâlî ve mu‘attal kalıp bana kānûn üzere hükm olundukda, işbu sâhibü’s-sicil Kosta b. Yani el-haddâd’a yüz on akçeye tapuya verdim nice dilerse mutasarrıf olup vakfa âid öşr-i şer‘iyyesin edâ ede, kimesne mâni‘ ve müzâhim olmaya dedikde mezbûr Kosta vicâhen tasdîk ettikde sıhhat-i akd-i tapu mukarrer olup bi’t-taleb kayd olundu. Vaka‘a’t-tahrîr fî evâili Rebî‘ayn sene 956. Şuhûdü’l-hâl: Ramazan b. Hüseyin, Yorgi b. Aguston Kethüdâ, Andon b. Dimo, Aleksi b. Yani, Nikola b. Kosta, Yorgi b. Matyos.