Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 449 Hüküm no: 509 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali Efendi b. Mustafa’nın Muhtesib İskender Mahallesi’nde arsası vakıf olan evini kardeşi Ahmed Efendi’ye sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ Mehmed Efendi irsâl olunup ol dahi mahmiye-i İstanbul’da Muhtesib İskender Mahallesiʼnde vâki‘ el-Hâc Ali Efendi b. Mustafa’nın sâkin olduğu menzile varıp zeyl-i kitâbda mastûrü’l-esâmî olan Müslimîn huzûrunda akd-i meclis-i şer‘-i nebevî eyledikde merkūm Ali Efendi meclis-i ma‘kūd-ı mezkûrda li-ebeveyn karındaşı işbu sâhibü’l-kitâb Ahmed Efendi mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrda vâki‘ bir tarafdan Abdullah Çelebi menzili ve bir tarafdan baʻzan Fâtıma Hatun menzili ve baʻzan tarîk ve bir tarafdan tarîk-i âm ile mahdûd hâriciyesinde iki bâb fevkānî oda ve bir sofa ve <> ve bir mâ-beyn odası ve bir ahırı ve bir kenîf ve dâhiliyesinde iki bâb fevkānî oda ve bir sofa ve tahtânî bir matbah ve bir kenîf ve bir mağsel ve bir su kuyusu ve zât-ı eşcâr-ı müsmire ve gayr-ı müsmire bir mikdâr bahçeyi müştemil arsamı merhûm ( ) sulehâya meşrûta vakfı olup izn-i mütevellî ile ebniyesi mülküm olan menzilin ebniye-i memlûkesini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile bin beş yüz guruşa mezbûr Ahmed Efendi’ye bey‘ ve temlîk ve teslîm eylediğimde ol dahi ber-vech-i muharrer iştirâ ve tesellüm ve temellük ve kabûl ve kabz eylediğinden sonra semeni olan meblağ-ı mezbûr bin beş yüz guruşu târih-i kitâbdan bir sene tamamına değin te’cîl eyledim baʻde’l-yevm menzil-i mahdûd-ı mezkûr cemî‘ müştemilâtıyla karındaşım mezbûr Ahmed Efendi’nin mülk-i müşterâsı ve hakk-ı sırfıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an irsâl olunan Mehmed Çelebi b. Abdurrahman ve Şa‘ban b. Abdullah ile meclis-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 15 min-Recebi’l-ferd sene 1121 Şuhûdü’l-hâl: Umdetü’l-mevâli’l-izâm Müstakim Efendi b. el-merhûm Şeyh Yusuf Efendi, el-Hâc İsmail b. el-Hâc Mehmed, Mustafa Çelebi b. Hasan Çelebi, es-Seyyid Mustafa Efendi b. es-Seyyid Mehmed el-İmâm, Mustafa Halîfe b. ( ) el-Müezzin, Abdullah Çelebi b. el-Hâc İsmail, Mustafa Çelebi b. Ömer Çelebi, Hasan Çelebi b. Mustafa, Mehmed Çelebi b. Ali, Hasan Çelebi b. Ahmed, İbrahim Çelebi b. Mustafa