Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 450 Hüküm no: 510 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arzu bt. Eyüb’ün geçinemediği kocası Mustafa b. Mehmed’den boşandığı Mahmiye-i İstanbul’da Kefeli Mahallesiʼnde sâkine olup zâtı Mehmed Efendi b. Mustafa ve Ali b. Murtaza nâm kimesneler ta‘rîfleriyle mu‘arrefe olan Arzu bt. Eyüb nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Mustafa b. Mehmed nâm kimesne mahzarında ikrâr ve takrîr-i kelâm edip mezbûr Mustafa zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan iki bin iki yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mustafa ile muhâla‘a-i sahîha-i şer‘iyye ile muhâla‘a olduğumda ol dahi hul‘-ı mezbûru baʻde’l-kabûl hukūk-ı zevciyete ve sâir târih-i kitâba gelince beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Cumâdelûlâ sene 1121 Şuhûdü’l-hâl: Ahmed Efendi b. Hüseyin el-İmâm, Mustafa Çelebi b. Şa‘ban, Abdullah Çelebi b. Abdullah, Hasan b. Mustafa, el-Hâc Hüseyin b. Ebûbekir, Hüseyin b. Bâli ve gayruhum mine’l-huzzâr.