Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 450 Hüküm no: 511 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İbrahim’in boşandığı kocası Halil b. Hasan’da olan nafaka ve mehir bedelini sulh yoluyla tahsil ettiği Mahmiye-i İstanbul’da Bayezid Mahallesiʼnde sâkine olup Mehmed Efendi b. Ahmed Efendi ve Mahmud Çelebi b. Mustafa nâm kimesneler ta‘rîfleriyle mu‘arrefe olan Fâtıma bt. İbrahim nâm hatun meclis-i şer‘-i şerîf-i enverde zevc-i sâbıkı işbu bâ‘isü’l-kitâb Halil b. Hasan nâm kimesne mahzarında ikrâr-ı tâm ve takrîr-i kelâm edip mezbûr Halil zevcim olup târih-i kitâbdan dört gün mukaddem beni bâyinen tatlîk etmekle zimmetinde mütekarrer ve ma‘kūdün-aleyh olan bin altı yüz akçe mehr-i müeccelim ve nafaka-i iddet ve meûnet-i süknâm için bi’t-terâzî ta‘yîn olunan dört yüz akçeyi mezbûr Halil’den taleb ve da‘vâ eylediğimde beynimizde nizâ‘-ı küllî vâkı‘a olmuş idi el-hâletü hâzihî beynimize muslihûn tavassut edip da‘vâ-yı mezkûremden beni mezbûr Halil ile mecmû‘u on guruş kıymetli bir orta keçesi ve kırk altı vakıyye yün ve dört aded yemenî yasdık yüzü ile nakd dört guruş ki cem‘an on dört guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr nakd dört guruş ile eşyâ-i mezkûreyi mezbûr Halil yedinden ahz u kabz edip hukūk-ı zevciyete ve sâir târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-Recebi’l-ferd sene 1121 Şuhûdü’l-hâl: Ahmed Efendi b. Mustafa Efendi el-İmâm, Mustafa Efendi b. Müstakim, Molla Mustafa Efendi b. Ahmed Efendi, Mehmed Efendi b. Ahmed Efendi, Mahmud Çelebi b. Mustafa, Ahmed Çelebi b. Mustafa, Halil b. Mehmed, Mustafa Çelebi b. Şa‘ban ve gayruhum mine’l-huzzâr.