Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 451 Hüküm no: 512 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mustafa’nın Keçeci Pîrî Mahallesi’ndeki evini Ali Beşe b. Abdullah’a sattığı Mahmiye-i İstanbul’da el-Hâc Hasan Mahallesi sâkinelerinden Hadice bt. Mustafa nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ma‘rifet-i şer‘iyye ile ârifân Mustafa b. Ahmed ve Ali b. Abdullah şehâdetleriyle şer‘an sâbit olan zevci Mahmud Çelebi b. el-Hâc Hasan nâm kimesne meclis-i şer‘-i şerîf-i enverde işbu râfi‘u’l-kitâb Ali Beşe b. Abdullah mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin zevcem müvekkile-i mezbûre Hadice Hatun’un yedinde mülk ve hakkı olup mahmiye-i mezbûrede Keçeci Pîrî Mahallesiʼnde vâki‘ bir tarafdan Mustafa Efendi mülkü ve bir tarafdan Safiye Hatun mülkü ve bir tarafdan Mehmed Çelebi mülkü ve bir tarîk [tarafdan] tarîk-i âm ile mahdûd arsasının senede merhûm ve mağfûrun-leh Sultan Bayezid-i Velî Vakfı’na iki akçe mukāta‘ası olup bir bâb tahtânî oda ve bir sofa ve havlu ve kenîfi müştemil mülk menzilini cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Ali Beşe’ye yetmiş beş guruşa bi’l-vekâle bey‘ ve temlîk ve teslîm ol dahi vech-i meşrûh üzere iştirâ ve temellük ve kabz ve kabûl eylediğinden sonra semeni olan meblağ-ı mezbûru müvekkilem mezbûre Hadice için merkūm Ali Beşe yedinden bi’l-vekâle tamamen ahz u kabz eyledim baʻde’l-yevm menzil-i mezbûrda müvekkilem mezbûre Hatice’nin alâkası kalmayıp mezbûr Ali Beşe’nin mülk ve hakkı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Recebi’l-ferd sene 1121 Şuhûdü’l-hâl: Mehmed Çelebi b. Mustafa, Mustafa b. Ahmed, Ali b. Abdullah, Mehmed b. Abdullah, Boşnak Ali b. Abdullah, İbrahim b. Yusuf, Mehmed b. İsmail, Mehmed b. Mehmed, Mustafa b. Şa‘ban, Ali b. İvaz ve gayruhum mine’l-huzzâr.