Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 452 Hüküm no: 513 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Fâtıma bt. İbrahim Paşa’nın Havvâ bt. Ali’ye borcunu ödemesi
Mahmiye-i İstanbul’da Davudpaşa Mahallesiʼnde sâkine olup zâtı ta‘rîf-i şer‘î ile mu‘arrefe olan Havvâ bt. Ali nâm hatun meclis-i şer‘-i şerîf-i enverde Fâtıma Hanım bt. İbrahim Paşa mahzarında üzerine da‘vâ ve takrîr-i kelâm edip bundan akdem yedimden iştirâ ve kabz eylediği beynimizde evsâfı ma‘lûm bir re’s câriye bahâsından iki yüz guruş ve cihet-i karzdan üç yüz guruş ki min-haysü’l-mecmû‘ beş yüz guruş hakkım olup meblağ-ı mezbûru mezbûre Fâtıma Hanım’dan taleb ve da‘vâ eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûre Fâtıma Hanım cevâbında fi’l-vâki‘ yedinden iştirâ ve kabz eylediğim beynimizde evsâfı ma‘lûm bir re’s câriye bahâsından iki yüz guruş ve cihet-i karzdan dahi üç yüz guruş ki min-haysü’l-mecmû‘ beş yüz guruş hâlâ müdde‘iye-i mezbûre Havvâ’ya zimmetimde lâzımü’l-edâ deynimdir deyü bi-tav‘ihâ ikrâr u i‘tirâf etmeğin mûcebince meblağ-ı mezbûr beş yüz guruşu müdde‘iye-i mezbûre Havvâ’ya edâ ve teslîme mezbûre Fâtıma Hanım’a tenbîh olunup mâ-vaka‘a bi’t-taleb ketb olundu.
Fî 21 min-Recebi’l-ferd sene 1121
Şuhûdü’l-hâl: Mustafa Çavuş b. Ahmed, Mustafa Çelebi b. Şa‘ban, Çalık Mehmed b. Ahmed, Hasan Beşe b. Abdullah, Ali Çelebi b. Abdullah ve gayruhum mine’l-huzzâr.
|