Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 452 Hüküm no: 514 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şarköy’den Ebûbekir Ağa b. Ömer’e borçlu olan Dimitri v. Filyo’nun borcunu ödemesi Medîne-i Gelibolu’ya tâbi‘ Şarköy nâm karye sâkinlerinden işbu râfi‘u’l-vesîka Ebûbekir Ağa b. Ömer nâm kimesne mahfil-i kazâda karye-i mezbûreden Dimitri v. Filyo nâm zimmî muvâcehesinde üzerine da‘vâ ve takrîr-i kelâm edip merkūm Dimitri’ye bundan akdem sermâye olmak üzere verdiğim iki yüz elli guruşun yüz guruşunu baʻde’l-hesâb yedinden kabz edip yüz elli guruşu zimmetinde bâkī kalmağla suâl olunup alıverilmesi matlûbumdur dedikde gıbbe’s-suâl merkūm Dimitri cevâbında fi’l-hakīka kaziyye minvâl-i muharrer üzere olup müdde‘î-i mezbûra meblağ-ı mezbûr yüz elli guruş el-ân zimmetimde deynimdir deyü ikrâr u i‘tirâf etmeğin mûcebince meblağ-ı mezbûr yüz elli guruşu müdde‘î-i mezbûra edâya merkūm Dimitri’ye tenbîh-birle mâ-vaka‘a bi’t-taleb ketb olundu. Fî 21 min-Recebi’l-ferd sene 1121 Şuhûdü’l-hâl: Abdullah b. Ahmed, Mehmed b. Ramazan, İbrahim b. Receb, Mehmed Beşe b. Receb, İsmail Ağa b. Mustafa ve gayruhum mine’l-huzzâr.