Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 453 Hüküm no: 515 Orijinal metin no: [71a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abbas’ın geçinemediği kocası Mehmed b. Salih’den boşandığı Mahmiye-i İstanbul’da Zincirlikuyu kurbünde Ali Paşa-yı Atîk Mahallesiʼnde sâkine olup zâtı Mehmed b. Ahmed ve Ahmed b. Osman nâm kimesneler ta‘rîfleriyle mu‘arrefe olan Fâtıma bt. Abbas nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Mehmed b. Salih nâm kimesne mahzarında ikrâr ve takrîr-i kelâm edip zevcim mezbûr Mehmed ile beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan bin iki yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl eylediğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Recebi’l-mürecceb sene 1121 Şuhûdü’l-hâl: Mustafa Çelebi b. Şa‘ban, Hasan b. Mustafa, Mehmed b. Ahmed, Ahmed b. Osman, Abdülkerim b. Ahmed, Ali b. İvaz, Ali b. Bâli, Hasan b. Ali, el-Hâc Ahmed b. el-Hâc Ali, İbrahim b. el-Hâc Ahmed, Abdullah b. el-Hâc Lütfullah ve gayruhum mine’l-huzzâr.