Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 453 Hüküm no: 516 Orijinal metin no: [71a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Abdullah’ın Ali Paşa Fırını’nda mevcut çeşitli eşyalardaki hissesini Avanos v. Begos’a sattığı Mahmiye-i İstanbul’da Ali Paşa Mahallesiʼnde sâkin Mustafa Çelebi b. Abdullah nâm kimesne mahfil-i kazâda işbu râfi‘u’s-sifr Avanis [Avanos] v. Begos nâm zimmî muvâcehesinde ikrâr ve takrîr-i kelâm edip eşyâ-i memlûkemden olup mahalle-i mezbûrede vâki‘ Ali Paşa fırını demekle ma‘rûf fırında mevcûd beynimizde veznleri ma‘lûm tuz ve odundan olan on bin akçe sermâye ve üç re’s bârgir ve dört kebîr tekne ve yirmi pinakot ve bir bakır terâzi ve sâir beynimizde ma‘lûm âlât-ı lâzımesinin on iki sehm i‘tibârı ile bir sehm hisse-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Avanos zimmîye iki yüz altmış guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr Avanos zimmî yedinden tamamen ahz u kabz eyledim baʻde’l-yevm eşyâ-i muharrere-i mezkûrenin on iki sehmde bir sehm hisse-i şâyi‘i mezbûr Avanos zimmînin mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mezbûr Mustafa Çelebi meclis-i mezkûrda merkūm Avanos ile bundan akdem ekmekçilik san‘atında şerîkler olup fesh-i akd-i şirket edip her birimiz hissemizi ahz ve istîfâ eyledik baʻde’l-yevm şirket-i mezbûra ve âmme-i da‘vâdan her birimiz âharın zimmetini ibrâ ve iskāt eyledik dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 21 min-Recebi’l-ferd sene 1121 Şuhûdü’l-hâl: Kethüdâ İbrahim Ağa b. Osman, Yiğitbaşı Ömer Ağa b. Mehmed, Sayıcı Mustafa b. Hüdaverdi, el-Hâc Murtaza b. Ali, Mehmed Çelebi b. Murtaza, es-Seyyid el-Hâc Halil b. İbrahim, Ali Çelebi b. Halil, Ali Çelebi b. Ömer, Abdurrahman Çelebi b. Ahmed, Mehmed Çelebi b. Abdi Kethüdâ-yı muhzırân ve gayruhum mine’l-huzzâr. Kogos v. Mircan, Kabril v. Markos, Kogas v. Sergis, Marat v. Avanis