Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 454 Hüküm no: 517 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi b. Ahmed’in Tırnova kasabasındaki haffaf dükkanının kardeşi Mehmed Çelebi’ye sattığı Vilâyet-i Rumeli’nde Tırnova kasabası sükkânından olup mahmiye-i İstanbul’da Ma‘cûncu kurbünde müsâferet vechi üzere sâkin Süleyman Çelebi b. Ahmed nâm kimesne meclis-i şer‘-i şerîf-i enverde li-ebeveyn karındaşı işbu bâ‘isü’l-kitâb Mehmed Çelebi nâm kimesne mahzarında ikrâr ve takrîr-i kelâm edip yedimde mülk ve hakkım olup kasaba-i mezbûrede vâki‘ lede’l-ahâlî ve’l-cîrân ma‘lûmü’l-hudûd haffâf dükkânımı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile karındaşım mezbûr Mehmed Çelebi’ye yüz otuz guruşa bey‘ ve temlîk ol dahi ber-vech-i muharrer iştirâ ve kabûl eylediğinden sonra semeni olan meblağ-ı mezbûr yüz otuz guruşu mezbûr Mehmed Çelebi yedinden tamamen ahz u kabz edip mebî‘-i mezbûru mahallinde zabt u tasarrufa karındaşım mezbûr Mehmed Çelebi’yi taslît eyledim baʻde’l-yevm dükkân-ı mahdûd-ı mezkûr karındaşım mezbûr Mehmed Çelebi’nin mülk-i müşterâsı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Recebi’l-ferd sene 1121 Şuhûdü’l-hâl: Mustafa Çelebi b. Şa‘ban, Hasan Çelebi b. Mustafa, Hasan Çelebi b. Abdullah, Ali Çelebi b. Bâli, Mehmed b. Hüseyin, İbrahim b. Mehmed, Ali b. Hasan, Ketenci el-Hâc Mustafa b. Abdullah, Ali Çelebi b. İvaz ve gayruhum mine’l-huzzâr.